بۇل تۋرالى ۋكراينانىڭ قورعانىس مينيسترلٸگٸنە قاراستى بارلاۋ قىزمەتٸ مەلٸمدەدٸ دەپ حابارلايدى Dalanews.kz.
اگەنتتٸك ٶكٸلٸ ۆاديم سكيبيتسكييدٸڭ ايتۋىنشا مايدان دالاسىندا مىڭداعان ساربازىنان ايىرىلىپ, ەسكەري تەحنيكاسى تاۋسىلۋعا شاق تۇرعان رەسەي ٶزٸ سەكٸلدٸ اۆتوكرات ەلدەردەن الاقان جايىپ, كٶمەك سۇراۋدا.
زاماناۋي قارۋ-جاراققا مۇحتاج كرەمل بۇعان دەيٸن يراننىڭ الدىنا بارعان, كەيٸننەن سولتٷستٸك كورەيا مەن قىتايدىڭ ەسٸگٸن قاققان.
ال قازاقستان مەن ٶزبەكستان بيلٸگٸ استامشىل, اگرەسسور ەلگە باتىس سانكتسييالارىن اينالىپ ٶتۋگە جەردەمدەسٸپ جاتقانى جايى بار.
سٶي دەگەن سكيبيتسكيي قۇداي سٷيەر قىلىعى جوق كرەمل كٶسەمٸمەن اۋىز جالاسقان ەلدەردٸ سانكتسييامەن جازالاۋدى سۇراۋدا.
«مەسكەۋگە يراننان الدىراتىن وتتى قارۋ ازدىق ەتٸپ وتىر. ولار قىتاي مەن سولتٷستٸك كورەيانىڭ اياعىنا جىعىلىپ, مايدان دالاسىندا جالاڭ قولمەن ۇرىسىپ, جالاڭبۇت جٷرگەن ەسكەرٸنە قول ۇشىن سوزۋدى سۇراپ وتىر. دەل وسى ٶتٸنٸشپەن قىرعىز بيلٸگٸنە شىعىپ, جاپاروۆتى قولقالاعان. مەسكەۋ بٸشكەكتەن «سمەرچ» مەن «ۋراگان» سەكٸلدٸ زىمىران كەشەندەرٸنە قاجەتتٸ وق-دەرٸ سۇراعان», – دەدٸ سكيبيتسكيي La Repubblica باسىلىمىنا بەرگەن سۇحباتىندا.
ۋكراين بارلاۋشىسى قازاقستان مەن ٶزبەكستاننىڭ باتىستىڭ كٶزٸن الا بەرٸپ, رەسەيگە جەردەمدەسٸپ وتىرعانىن ايتادى.
«استانا مەن تاشكەنت سانكتسييا سالدارىنان جوعارى تەحنولوگيياعا زەرۋ بوپ قالعان رەسەيگە ٶندٸرٸستٸك ماقساتتاعى, الايدا قارۋ-جاراق جاساۋعا دا جاراي بەرەتٸن كومپونەنتتەردٸ ساۋدالاپ وتىر. بۇلاردىڭ باسىم بٶلٸگٸ اتالعان ەلدەرگە امەريكا مەن جاپونييادان كەلەدٸ. مەسكەۋ ازاماتتىق, تۇرمىستىق ماقساتتاعى كومپونەتتەردٸ قاجەتٸنە جاراتىپ, راكەتا جاساۋعا پايدالانۋدا», – دەيدٸ سكيبيتسكيي.
ۋكراين بارلاۋشى مەسكەۋدٸڭ زاماناۋي قارۋ-جاراق جاسايتىن پوتەنتسيالى جوق دەپ پايىمدايدى, وسى سەبەپتٸ ٶزگە ەلدەردەن جەردەم سۇراۋعا مەجبٷر.
