Orys pravoslav shirkeýiniń (RPTs) burynǵy dini qyzmetkeri Iakov Vorontsov ózine qatysty bir jarym jylǵa jýyq júrgizilgen qylmystyq istiń toqtatylǵanyn málimdedi, dep habarlaidy Dalanews.kz.
“Maǵan taǵylǵan ekstremizm boiynsha aiyptaý isi aqtaý negizinde toqtatyldy – iaǵni meniń áreketterimde qylmys quramy bolmaǵany anyqtaldy. Kinásiz ekenimdi dáleldeý úshin 16 ai tergeý júrgizilip, birneshe saraptama taǵaiyndaldy. Shyntýaitynda, bul istiń negizsiz, jala jabýǵa qurylǵanyn basynan-aq kóp adam túsindi. Bul maǵan qarsy baǵyttalǵan kek alý áreketi edi — meniń shyndyq pen bostandyq jolyndaǵy azamattyq ári hristiandyq ustanymymdy qaralaý maqsatynda jasalǵan”, – dep jazdy Vorontsov beisenbi kúni óziniń áleýmettik jelidegi paraqshasynda.
Ol ózine qoldaý bildirgen barlyq azamatqa alǵys aitty, ásirese advokattar Dias Ahmetov pen Ǵalym Nurpeiisovke, sondai-aq Qazaqstandaǵy Adam quqyqtary jónindegi halyqaralyq biýro men quqyq qorǵaýshy Evgenii Jovtiske rizashylyǵyn bildirdi.
“Men Qazaqstan prezidenti Qasym-Jomart Kemeluly Toqaevqa eki ret hat joldap, qorǵaýyn suradym. Endi óz rizashylyǵymdy bildirip, oǵan alǵys hat jazdym — Qazaqstanda ar-ojdan bostandyǵy men adam quqyqtaryn qurmetteitin, zań ústemdigin jáne aqyl-sananyń saltanat qurýyn qamtamasyz etetin orta qalyptastyryp jatqany úshin. Sondai-aq isti júrgizgen tergeýshige de zańǵa adaldyǵy men ádilettiligi úshin alǵys aitamyn. Árine, ómirimniń 16 aiy jelge ushty dese de bolady. Bul men úshin de, jaqyndarym úshin de aýyr synaq boldy, júikemizge salmaq saldy. Bunyń ornyn eshkim toltyra almaidy. Biraq men eshkimge renjimeimin. Bul sátti kóp kúttim, biraq moraldyq turǵyda daiyn bolmai shyqtym. Úlken josparlarym bar edi. Eger olardy júzege asyrýǵa bel bailasam, maǵan sizderdiń kómekterińiz kerek bolady, dostarym!” – dep túiindedi ol.
Eske salaiyq, buǵan deiin Reseidiń Ýkrainaǵa basqynshylyǵyn ashyq synǵa alǵan dini qyzmetker Iakov Vorontsov politsiiaǵa shaqyrtylyp, ústinen qylmystyq is qozǵalǵan edi. Ol bul oqiǵanyń artynda Reseidiń arnaiy qyzmetiniń yqpaly bolýy múmkin ekenin málimdegen.
Vorontsovtyń aitýynsha, 2023 jyly 2 tamyzda jazǵan áleýmettik jelidegi jazbasyna bailanysty belgisiz bireý eOtinish platformasy arqyly aryz túsirgen. Jazbasynda ol orys fashizmi men RPTs týraly syni pikir bildirgenin aitady. Osyǵan bailanysty politsiia qyzmetkerleri oǵan QR Qylmystyq kodeksiniń 174-baby – “Áleýmettik, ulttyq, rýlyq, násildik nemese dini arazdyqty qozdyrý” boiynsha túsinikteme berýdi talap etken.
“Men óz pikirimnen bas tartpaimyn. Arazdyq nemese óshpendilik týǵyzý oiymda bolǵan joq. Qaita barsha halyqqa beibit ómir men tatýlyq tileimin. Pikirim úshin jaýap berýge daiynmyn”, – dep jazdy ol Facebook paraqshasynda.
Vorontsov túsinikteme berýden alǵashynda bas tartqanyn aitady. Alaida politsiia qyzmetkerleri eger ol jazbasha túsinikteme bermese, onyń jazbasyna lingvistikalyq saraptama jasalatynyn, bul saraptama 174-bap boiynsha is qozǵaýǵa negiz bolýy múmkin ekenin eskertken.
Aita keteiik, Iakov Vorontsov — qazaq tilinde dini qyzmet atqarǵan tuńǵysh orys pravoslav shirkeýiniń ókili. Resei soǵysty bastaǵannan keiin ol agressiiany aiyptap, Qazaqstandy UQShU quramynan shyǵýǵa shaqyrǵan. Sonymen qatar, Máskeý patriarhatyna baǵynatyn qazaqstandyq shirkeýlerdiń táýelsizdigin talap etip, RPTs-degi ierarhiialyq basqarý júiesin qatty synǵa alǵan.
2024 jyldyń maýsymynda Vorontsov resmi túrde shirkeýdegi qyzmetin toqtatqan. Onyń sózinshe, sońǵy bir jylda Qazaqstan mitropolit okrýgynyń basshylyǵy ony baqylaýda ustaýǵa tyrysyp kelgen.
