ورىس پراۆوسلاۆ شىركەۋىنىڭ (رپس) بۇرىنعى ءدىني قىزمەتكەرى ياكوۆ ۆورونسوۆ وزىنە قاتىستى ءبىر جارىم جىلعا جۋىق جۇرگىزىلگەن قىلمىستىق ءىستىڭ توقتاتىلعانىن مالىمدەدى، دەپ حابارلايدى Dalanews.kz.
“ماعان تاعىلعان ەكسترەميزم بويىنشا ايىپتاۋ ءىسى اقتاۋ نەگىزىندە توقتاتىلدى – ياعني مەنىڭ ارەكەتتەرىمدە قىلمىس قۇرامى بولماعانى انىقتالدى. كىناسىز ەكەنىمدى دالەلدەۋ ءۇشىن 16 اي تەرگەۋ جۇرگىزىلىپ، بىرنەشە ساراپتاما تاعايىندالدى. شىنتۋايتىندا، بۇل ءىستىڭ نەگىزسىز، جالا جابۋعا قۇرىلعانىن باسىنان-اق كوپ ادام ءتۇسىندى. بۇل ماعان قارسى باعىتتالعان كەك الۋ ارەكەتى ەدى — مەنىڭ شىندىق پەن بوستاندىق جولىنداعى ازاماتتىق ءارى حريستياندىق ۇستانىمىمدى قارالاۋ ماقساتىندا جاسالعان”، – دەپ جازدى ۆورونسوۆ بەيسەنبى كۇنى ءوزىنىڭ الەۋمەتتىك جەلىدەگى پاراقشاسىندا.
ول وزىنە قولداۋ بىلدىرگەن بارلىق ازاماتقا العىس ايتتى، اسىرەسە ادۆوكاتتار دياس احمەتوۆ پەن عالىم نۇرپەيىسوۆكە، سونداي-اق قازاقستانداعى ادام قۇقىقتارى جونىندەگى حالىقارالىق بيۋرو مەن قۇقىق قورعاۋشى ەۆگەنيي جوۆتيسكە ريزاشىلىعىن ءبىلدىردى.
“مەن قازاقستان پرەزيدەنتى قاسىم-جومارت كەمەل ۇلى توقايەۆقا ەكى رەت حات جولداپ، قورعاۋىن سۇرادىم. ەندى ءوز ريزاشىلىعىمدى ءبىلدىرىپ، وعان العىس حات جازدىم — قازاقستاندا ار-وجدان بوستاندىعى مەن ادام قۇقىقتارىن قۇرمەتتەيتىن، زاڭ ۇستەمدىگىن جانە اقىل-سانانىڭ سالتانات قۇرۋىن قامتاماسىز ەتەتىن ورتا قالىپتاستىرىپ جاتقانى ءۇشىن. سونداي-اق ءىستى جۇرگىزگەن تەرگەۋشىگە دە زاڭعا ادالدىعى مەن ادىلەتتىلىگى ءۇشىن العىس ايتامىن. ارينە، ءومىرىمنىڭ 16 ايى جەلگە ۇشتى دەسە دە بولادى. بۇل مەن ءۇشىن دە، جاقىندارىم ءۇشىن دە اۋىر سىناق بولدى، جۇيكەمىزگە سالماق سالدى. بۇنىڭ ورنىن ەشكىم تولتىرا المايدى. ءبىراق مەن ەشكىمگە رەنجىمەيمىن. بۇل ءساتتى كوپ كۇتتىم، ءبىراق مورالدىق تۇرعىدا دايىن بولماي شىقتىم. ۇلكەن جوسپارلارىم بار ەدى. ەگەر ولاردى جۇزەگە اسىرۋعا بەل بايلاسام، ماعان سىزدەردىڭ كومەكتەرىڭىز كەرەك بولادى، دوستارىم!” – دەپ تۇيىندەدى ول.
ەسكە سالايىق، بۇعان دەيىن رەسەيدىڭ ۋكرايناعا باسقىنشىلىعىن اشىق سىنعا العان ءدىني قىزمەتكەر ياكوۆ ۆورونسوۆ پوليسياعا شاقىرتىلىپ، ۇستىنەن قىلمىستىق ءىس قوزعالعان ەدى. ول بۇل وقيعانىڭ ارتىندا رەسەيدىڭ ارنايى قىزمەتىنىڭ ىقپالى بولۋى مۇمكىن ەكەنىن مالىمدەگەن.
ۆورونسوۆتىڭ ايتۋىنشا، 2023 جىلى 2 تامىزدا جازعان الەۋمەتتىك جەلىدەگى جازباسىنا بايلانىستى بەلگىسىز بىرەۋ eOtinish پلاتفورماسى ارقىلى ارىز تۇسىرگەن. جازباسىندا ول ورىس ءفاشيزمى مەن رپس تۋرالى سىني پىكىر بىلدىرگەنىن ايتادى. وسىعان بايلانىستى پوليسيا قىزمەتكەرلەرى وعان ق ر قىلمىستىق كودەكسىنىڭ 174-بابى – “الەۋمەتتىك، ۇلتتىق، رۋلىق، ناسىلدىك نەمەسە ءدىني ارازدىقتى قوزدىرۋ” بويىنشا تۇسىنىكتەمە بەرۋدى تالاپ ەتكەن.
“مەن ءوز پىكىرىمنەن باس تارتپايمىن. ارازدىق نەمەسە وشپەندىلىك تۋعىزۋ ويىمدا بولعان جوق. قايتا بارشا حالىققا بەيبىت ءومىر مەن تاتۋلىق تىلەيمىن. پىكىرىم ءۇشىن جاۋاپ بەرۋگە دايىنمىن”، – دەپ جازدى ول Facebook پاراقشاسىندا.
ۆورونسوۆ تۇسىنىكتەمە بەرۋدەن العاشىندا باس تارتقانىن ايتادى. الايدا پوليسيا قىزمەتكەرلەرى ەگەر ول جازباشا تۇسىنىكتەمە بەرمەسە، ونىڭ جازباسىنا لينگۆيستيكالىق ساراپتاما جاسالاتىنىن، بۇل ساراپتاما 174-باپ بويىنشا ءىس قوزعاۋعا نەگىز بولۋى مۇمكىن ەكەنىن ەسكەرتكەن.
ايتا كەتەيىك، ياكوۆ ۆورونسوۆ — قازاق تىلىندە ءدىني قىزمەت اتقارعان تۇڭعىش ورىس پراۆوسلاۆ شىركەۋىنىڭ وكىلى. رەسەي سوعىستى باستاعاننان كەيىن ول اگرەسسيانى ايىپتاپ، قازاقستاندى ۇقشۇ قۇرامىنان شىعۋعا شاقىرعان. سونىمەن قاتار، ماسكەۋ پاتريارحاتىنا باعىناتىن قازاقستاندىق شىركەۋلەردىڭ تاۋەلسىزدىگىن تالاپ ەتىپ، رپس-دەگى يەرارحيالىق باسقارۋ جۇيەسىن قاتتى سىنعا العان.
2024 جىلدىڭ ماۋسىمىندا ۆورونسوۆ رەسمي تۇردە شىركەۋدەگى قىزمەتىن توقتاتقان. ونىڭ سوزىنشە، سوڭعى ءبىر جىلدا قازاقستان ميتروپوليت وكرۋگىنىڭ باسشىلىعى ونى باقىلاۋدا ۇستاۋعا تىرىسىپ كەلگەن.
