Ýkraina qazaqstandyq milliarderdiń múlkine sanktsiia saldy

Ýkrainada qazaqstandyq kásipker Timýr Týrlovtyń kompaniiasyna sanktsiia salyndy. Bul týraly kompaniianyń baspasóz qyzmeti málimdedi.

«Ýkrainanyń baǵaly qaǵazdar jáne qor naryǵy jónindegi ulttyq komissiiasy «Fridom Finans Ýkraina» JShQ litsenziialaryn 2022 jylǵy 19 qazanda Ýkraina prezidentiniń jarlyǵymen Ýkrainanyń Ulttyq qaýipsizdik jáne qorǵanys keńesiniń «jeke arnaiy ekonomikalyq jáne basqa da shekteý sharalaryn qoldaný jáne olarǵa ózgerister engizý týraly» sheshimi negizinde toqtatty», – delingen habarlamada.

Kompaniianyń habarlaýynsha, sanktsiialardyń negizgi saldarynyń biri – klient aldyndaǵy mindettemelerdi oryndamaý. Biraq kompaniia bul shekteýlerdi qatelik dep sanap, sheshimge qarsy ekenderin bildiredi.

«Bizdiń qyzmetimiz jáne kompaniianyń qurylymy týraly tolyq aqparatpen barlyq instantsiialarǵa ótinishter jiberildi», – dep habarlady kompaniia.

Budan ári kompaniia ýkrainalyq investorlar «Fridom Finans Ýkraina» arqyly satyp alǵan jáne depozitarlyq mekemede saqtalǵan barlyq aktivter klientterge tolyq menshik quqyǵy negizinde tiesili dep atap ótti.

«Kompaniia múmkindiginshe klientter aldyndaǵy barlyq mindettemelerdi oryndaidy. Sanktsiialar salý Ýkrainanyń qor naryǵynyń búkil júiesi úshin kútpegen jaǵdai boldy. Biz Ýkrainada jyldar boiy jumys istep, Ýkrainanyń qor naryǵyn, onyń ekonomikasyn, qor naryǵynyń infraqurylymyn belsendi damytyp kelemiz. Sanktsiialar tek «Fridom Finans Ýkraina» JShQ-ǵa qatysty boldy. Sol arqyly qazir klientter Ýkrainanyń qor naryǵynda baǵaly qaǵazdarmen saýda jasaidy», – dep habarlady kompaniianyń baspasóz qyzmeti.