1 qyrkúiekke qaraǵan túni Reseidiń Ýkrainaǵa jasaǵan jappai zymyran-dron soqqysynan 12 adam qaza tapty, dep habarlaidy dalanews.kz.
«Jalpy 12 adam qaza tapty, olardyń arasynda Úndistan azamaty bar, ondaǵan adam jaraqat aldy», – dedi Ýkraina prezidenti Vladimir Zelenskii.
Onyń málimetinshe, Resei kúshteri Kiev pen Ýkrainanyń taǵy 10 óńirine kóp mólsherde reaktivti drondar men ballistikalyq zymyrandar qoldanyp shabýyl jasaǵan. Soqqy saldarynan turǵyn úiler men azamattyq infraqurylym nysandary zaqymdanǵan.
Kievte shabýyl, atap aitqanda, temirjol deposyna tigen. Ýkrainalyq taraptyń málimetinshe, onda jeti adam qaza tapqan. Kiev oblysynyń Borispol qalasynda bes qabatty turǵyn úi zaqymdalyp, ǵimarattan shamamen 50 adam evakýatsiialanǵan. Qalada tórt adam qaza taýyp, taǵy 13 adam jaraqat alǵan.
Shabýyl Odessa oblysyna da áser etti. Zelenskiidiń aitýynsha, soqqy saldarynan Rýmyniiamen shekara ótkeli jáne eksporttyq infraqurylym zaqymdanǵan. Birneshe myń otbasy elektr qýatynsyz qalyp, qalpyna keltirý jumystary júrgizilip jatyr.
Ýkraina Qarýly kúshteriniń Áýe kúshteri málimetinshe, 31 tamyz saǵat 18:00-den bastap Resei áskeri 218 shabýyldaýshy dron ushyrǵan. Olardyń shamamen úshten biri reaktivti bolǵan. Budan bólek, «Iskander-M», KN-23 jáne S-400 ballistikalyq zymyrandary, «Tsirkon» kemege qarsy zymyrandary, «Kalibr» qanatty zymyrandary, H-31P radiolokatsiiaǵa qarsy zymyrandary jáne basqa da soqqy quraldary qoldanylǵan.
Ýkraina tarapy 199 áýe nysanyn ustap qalǵan nemese basyp-janshyp joiǵanyn málimdedi. Olardyń qatarynda 187 dron, bes ballistikalyq zymyran jáne bes «Kalibr» zymyrany bar. Sonymen birge 28 jerde soqqy bolǵany, taǵy 10 jerde atyp túsirilgen nysandardyń synyqtary qulaǵany tirkelgen.
Resei Qorǵanys ministrligi shabýyldardyń Kiev jáne Odessa oblystaryndaǵy, sondai-aq olarǵa irgeles óńirlerdegi áskeri jáne energetikalyq nysandarǵa jasalǵanyn habarlady.
Qazirgi shabýyl Kiev pen oǵan irgeles aýmaqtarǵa Reseidiń qarqyndy áýe soqqylary qatarynan altynshy kúnge sozylǵanyn kórsetedi. Sońǵy shabýyldarda jańa reaktivti drondar belsendi qoldanylǵan. Ýkraina biliginiń málimetinshe, olardyń joǵary jyldamdyǵyna bailanysty mundai drondardy ustap qalý qiynyraq.
Shabýyl Ýkrainada jańa oqý jyly bastalǵan alǵashqy kúnge tuspa-tus keldi. Áýe shabýyldary jalǵasyp jatqan jaǵdaida Kiev Batystaǵy odaqtastaryn áýe shabýylyna qarsy qorǵanys júieleri men zymyran ustaǵyshtardy jetkizýdi jedeldetýge qaita shaqyrdy.
