Saiasattanýshy Daniiar Áshimbaev Qazaqstan ekonomikasy, onyń damý barysyndaǵy Úkimet músheleriniń úlesine qatysty óz pikirin bildirdi. Maman bul rettegi múshkil háldi búginderi keibir ministrlerdiń kelemej, ýáj nysanyna ainalýyn mysalǵa keltire otyryp, synaidy, dep habarlaidy Dalanews.kz.
"Menińshe, Úkimet qoǵamnyń sanasyna "ekonomikadaǵy jaǵdai óte jaqsy, oǵan qazirgi ministrler kabineti at salysty" degen oidy quiyp baǵýda. Shyndyǵynda, bizde ekonomikadaǵy jaǵdai árdaiym jaqsy bolyp kelgen. Biraq, sońǵy jyldary "Qazaqstan táýelsizdiktiń barlyq 30 jylynda durys baǵytta damymaǵan" degen pikirdi alǵa tarta berý ádetke ainalǵan. Óstip, osyǵan deiingi alaýlatyp-jaýlatyp nasihattalyp kelgen qazaqstandyq jetistikter, reformalar, tabystar týraly dańq-daqpyrttyń kúshi suiyldy. Biraq fenomenaldy ekonomikalyq ósim men áleýmettik ádilettilikti qamtamasyz etý úshin tartylǵan úkimettik ekonomisterdiń jańa býyny quzyrettilikpen de, bilimimen de, biliktiligimen de burynǵylarynan erekshelene almai, arttarynyń qýys ekenin tez bildirip aldy (jumystyń tiimdiligi jaǵyna qatysty sypaiylyq turǵysynda aýyz ashpai-aq ta qoialyq). Deńgeidiń sonshalyqty tómendigi Úkimettiń keibir músheleri syn bylai tursyn, ashyqtan ashyq kelemejge ushyraityn jaǵdaiǵa jetken. Rasynda, sońǵy jyly biýdjette tolyqtai teńgerimsizdik oryn aldy, investitsiialyq jáne salyq aýany kúrt nasharlady, infliatsiia údei tústi. Ádette, barlyq bále-jalany jaba salatyn syrtqy kúizelister saldaryna qaraǵanda ekonomikalyq bloktyń áreketterinen ekonomika áldeqaida kóp zardap shegýde (bul arada kem degende eki-úsh salalyq vitse-premer ózinshe áreket jasaýǵa tyrysqanyn ádilettilik úshin atai ketelik)", dep jazdy Daniiar Áshimbaev Telegram-daǵy arnasynda.
Ol mundai jaǵdaida, árine, baǵyt-baǵdarymyzdy aqyryndap túzep, sonymen qatar qoǵamda jaǵymdy kózqaras qalyptastyrý úshin jumystar jasalýy tiis ekenin aitady.
"Eń birinshi kezekte, bizge basy myqty isteitin mamandar qajet, ekinshiden, taǵy da myqty bastar kerek. Endi bul rette ne jasalyp jatqanyna kóz júgirtelik. Áýp degennen, qazir memlekettik aýdit basyndaǵy Smaiylovqa barlyq kináni artýǵa tyrysý boldy. Árine, burynǵy Úkimet basshysyn synaýǵa bolady, biraq ol úshin odan keiin bolǵan olqylyqtardy kimge jabady? Onyń ústine búginderi Joǵary aýditorlyq palata Májilis qabyrǵasynda ótken jyldyń biýdjeti boiynsha esep berip, mán-jaidy egjei-tegjei túsindirip jatqan jaiy bar. Sonyń ishinde densaýlyq saqtaý salasyndaǵy urlanǵan-jyrǵalǵan jailar da aityldy. Densaýlyq saqtaý ministrligi ún qatyp, aqtalýǵa tyrysty, biraq kelesi kúni Antikor ÁMSQ Basqarma tóraǵasynyń orynbasaryn qamaýǵa aldy. Sol kezde ǵana Úkimet músheleriniń miyna "memlekettik aýditpen daýlasýdan paida joǵy" aqyry jetip, strategiiany ózgertti. Endi eshkimniń de kinási joq, barlyǵy sútten aq, sýdan taza, al ekonomikadaǵy jaǵdai tamasha sekildi bola qalypty. Al ekonomika ministriniń shegirtkeniń jeýge jaramdy qasietteri týraly pikiri, jurtty ázirden shoshytyp otyrǵan salyq reformasy, toqtaýsyz baǵa ósimin qarastyratyn tariftik saiasattyń arqasynda údep jatqan infliatsiia - bul jái usaq-túiek nárse eken", - deidi saiasattanýshy.
Ol tek Úkimettiń oń imidjin qalyptastyrý kezeńi, jumsarta aitqanda, qolaisyz ýaqytqa tap kelgenin qaǵyta jetkizip, "biraq ekonomikalyq bloktan budan artyq aqylǵa qonymdy nárseni talap ete alamyz ba" degen ironiialyq suraqty ortaǵa tastaidy.
