Qazaqstanǵa tartylǵan sheteldik investitsiialardyń jalpy kólemi $58 mlrd-tan asty, dep habarlaidy Dala News.
Prezident Qasym-Jomart Toqaevtyń tóraǵalyǵymen ótken jiynda Premer-ministr Oljas Bektenov investitsiialyq saiasattyń negizgi nátijelerin baiandady. Onyń aitýynsha, sońǵy 9 aida tikelei sheteldik investitsiialar $1,5 mlrd-qa nemese 10,9% ósip, $14,9 mlrd-ty quraǵan.
«Portfeldik investitsiialar men nesielik qarajattardy esepke alǵanda, ekonomikaǵa tartylǵan sheteldik investitsiialardyń kólemi $58 mlrd-tan asty. Negizgi kapitalǵa salynǵan investitsiialar 13%-ǵa artyp, 22,7 trln teńgeni qurady», – dedi Oljas Bektenov.
Úkimet dereginshe, onyń ishinde memlekettik investitsiialar 800 mlrd teńgege ulǵaiyp, 5 trln teńgege jetse, jekemenshik investitsiialar 2,4 trln teńgege ósip, 17,7 trln teńgeni quraǵan.
Investorlarmen jumysty jedeldetý úshin Investitsiialyq shtabtyń róli kúsheitilgen. 2025 jyly jalpy quny $115 mlrd bolatyn 212 joba boiynsha problemalyq máseleler sheshilgen.
Bektenov Prezident tapsyrmasyna sáikes investorlardy tartý tetikteri jańartylyp jatqanyn atap ótti. Jobalar endi bastapqy kezeńnen bastap iske qosylǵanǵa deiin «jasyl dáliz» qaǵidaty boiynsha súiemeldenedi.
Atap aitqanda:
- investitsiialyq ombýdsmen fýnktsiialary Bas prokýrorǵa júkteldi;
- «Báiterek» holdingi investorlardy proaktivti túrde izdeýge kiristi;
- Kazakh Invest kompaniiasynyń ókildikteri investitsiialyq áleýeti joǵary elderde ashylady.
Sonymen qatar Memleket basshysynyń bastamasymen qurylatyn "Alataý Siti" jańa investitsiialyq ortalyq retinde qarastyrylyp otyr. Konstitýtsiialyq zań jobasynda qalaǵa erekshe quqyqtyq rejim engizý kózdelgen.
