Premer-Ministr Oljas Bektenov sý tasqynynan keiin turǵyn úiler men infraqurylymdy qalpyna keltirý máseleleri boiynsha keńes ótkizdi. Ónerkásip jáne qurylys ministri Qanat Sharlapaev, energetika ministri Almasadam Sátqaliev, kólik vitse-ministri Satjan Ablaliev aǵymdaǵy jaǵdai men atqarylyp jatqan jumystar týraly baiandady. Sondai-aq Batys Qazaqstan, Aqtóbe, Atyraý, Aqmola, Soltústik Qazaqstan jáne Qostanai oblystarynyń ákimderi tyńdaldy.
Elimizde sý tasqyny saldarynan qalpyna keltirýge kelmeitin barlyq úiler boiynsha qurylys jáne satyp alý jumystary júrgizilip jatyr. Sý tasqyny saldarynan barlyǵy 19 342 jyljymaityn múlik (jalǵyz baspana bolyp sanalatyn úiler men saiajailar) zaqymdandy, onyń 8 578-i qalpyna keltirýge jaramsyz dep tanyldy. Búgingi tańda 2 578 úi qurylysy men 6 myń jyljymaityn múlik satyp alý jumystary júrgizilýde.
Premer-Ministr SQO-da 200, Pavlodar oblysynda 5 jańa úi qurylysynyń jedel júrgizilgenin atap ótti. Sondai-aq jýyrda Qostanai oblysynda 22 úi tapsyrylady. Jalpy, turǵyn úidi qalpyna keltirýdi jedeldetý úshin barlyq sharalar qabyldanǵany basa aityldy. Ákimdikter qajetti qarjymen tolyq qamtamasyz etildi, barlyq kemshilikter joiyldy, salynyp jatqan úilerdiń úlgilik jobalary bekitildi. Sonymen qatar jekelegen óńirlerde jumys kestesinen 15-25 kúnge artta qalýshylyq bar. Atap aitqanda, Batys Qazaqstan, Aqtóbe, Aqmola jáne Atyraý oblystarynda qurylys qarqyny tómen.
Úkimet basshysy ákimderge árbir nysanǵa adamdar men tehnika jumyldyrýdy tapsyryp, Prezident júktegen mindetterdi oryndaý úshin shamamen 2,5 ai qalǵanyn eske saldy. Bul rette Premer-Ministr qurylys normalaryn buzýǵa jol bermeý kerektigin talap etti.
«Qalpyna keltirý jumystarynyń qarqynyn jedeldetý qajet. Qurylys materialdaryn jetkizýge, eńbek resýrstary men arnaiy tehnikany alańdarda jumyldyrýǵa bailanysty barlyq máseleni jyldam sheshý qajet. Kesteden keshigýge ákelip soǵatyn barlyq problemalar týraly dereý ortalyqqa habarlaý kerek. Qajet bolsa, biz resýrstardy qaita bólip, tehnika men adamdardy kóbeitemiz. Barlyq qurylys normalary men qaýipsizdik talaptarynyń saqtalýyn qamtamasyz etý mańyzdy. Bul máseleler azamattardy alańdatpaýy kerek. Óńirlerdiń ákimderi úilerdiń sapasyna jeke jaýap beredi», — dep atap ótken Oljas Bektenov, Ónerkásip jáne qurylys ministrligine qurylys jumystarynyń sapasyn qatań baqylaýdy tapsyrdy.
Premer-Ministrdiń tapsyrmasy boiynsha ónerkásip jáne qurylys ministri Qanat Sharlapaev, energetika jáne kólik vitse-ministrleri jumys ýaqytynyń negizgi bóligin barlyq jumys aiaqtalǵanǵa deiin óńirlerde, tikelei qurylys alańdarynda ótkizetin bolady.
Jergilikti joldardy jóndeýge jáne rekonstrýktsiialaýǵa Úkimet rezervinen 22,7 mlrd teńge bólinip, zardap shekken óńirlerdegi mektepterdi qalpyna keltirýge 7,5 mlrd teńge baǵyttaldy. Barlyq mektep oqý jyly bastalǵanǵa deiin qalpyna keltiriledi.
Anyqtama: Zardap shekken aimaqtardaǵy úiler 100% tekserilip, baǵalandy. Baǵalaý qorytyndysy boiynsha 9 243 úi jóndeýge jatady. Jalpy somasy 44,1 mlrd teńgege 7505 otbasy turǵyn úidi jóndeýge jáne qalpyna keltirýge ótemaqy aldy. 8 578 nysan qalpyna keltirýge jaramaidy. Búgingi tańda 3 921 otbasy qiraǵan baspanasynyń ornyna jańa úi men páter aldy, 2 578 jańa úidiń qurylysy júrgizilýde. 33 820 otbasy 12,5 mlrd teńgeden astam somaǵa 100 AEK mólsherinde birjolǵy tólem aldy. Zardap shekken turǵyndardyń joǵaltqan asa qajetti zattaryn satyp alý úshin 20 606 otbasyna 9,4 mlrd teńge 150 AEK-ke deiingi mólsherde qosymsha ótemaqy tólendi. Sýǵa ketken maldyń óteýi úshin berilgen memlekettik kómek kólemi 2,8 mlrd teńgeden asty. Zardap shekken bizneske keltirilgen zalaldy óteý boiynsha óńirlik komissiialar ShOB sýbektileriniń jalpy somasy 1,5 mlrd teńge bolatyn 178 ótinimin qarap, maquldady.
