پرەمەر-مينيستر ولجاس بەكتەنوۆ سۋ تاسقىنىنان كەيىن تۇرعىن ۇيلەر مەن ينفراقۇرىلىمدى قالپىنا كەلتىرۋ ماسەلەلەرى بويىنشا كەڭەس وتكىزدى. ونەركاسىپ جانە قۇرىلىس ءمينيسترى قانات شارلاپايەۆ، ەنەرگەتيكا ءمينيسترى الماسادام ساتقالييەۆ، كولىك ۆيسە-مينيسترى ساتجان ابلالييەۆ اعىمداعى جاعداي مەن اتقارىلىپ جاتقان جۇمىستار تۋرالى باياندادى. سونداي-اق باتىس قازاقستان، اقتوبە، اتىراۋ، اقمولا، سولتۇستىك قازاقستان جانە قوستاناي وبلىستارىنىڭ اكىمدەرى تىڭدالدى.
ەلىمىزدە سۋ تاسقىنى سالدارىنان قالپىنا كەلتىرۋگە كەلمەيتىن بارلىق ۇيلەر بويىنشا قۇرىلىس جانە ساتىپ الۋ جۇمىستارى جۇرگىزىلىپ جاتىر. سۋ تاسقىنى سالدارىنان بارلىعى 19 342 جىلجىمايتىن مۇلىك (جالعىز باسپانا بولىپ سانالاتىن ۇيلەر مەن ساياجايلار) زاقىمداندى، ونىڭ 8 578ء-ى قالپىنا كەلتىرۋگە جارامسىز دەپ تانىلدى. بۇگىنگى تاڭدا 2 578 ءۇي قۇرىلىسى مەن 6 مىڭ جىلجىمايتىن مۇلىك ساتىپ الۋ جۇمىستارى جۇرگىزىلۋدە.
پرەمەر-مينيستر سقو-دا 200، پاۆلودار وبلىسىندا 5 جاڭا ءۇي قۇرىلىسىنىڭ جەدەل جۇرگىزىلگەنىن اتاپ ءوتتى. سونداي-اق جۋىردا قوستاناي وبلىسىندا 22 ءۇي تاپسىرىلادى. جالپى، تۇرعىن ءۇيدى قالپىنا كەلتىرۋدى جەدەلدەتۋ ءۇشىن بارلىق شارالار قابىلدانعانى باسا ايتىلدى. اكىمدىكتەر قاجەتتى قارجىمەن تولىق قامتاماسىز ەتىلدى، بارلىق كەمشىلىكتەر جويىلدى، سالىنىپ جاتقان ۇيلەردىڭ ۇلگىلىك جوبالارى بەكىتىلدى. سونىمەن قاتار جەكەلەگەن وڭىرلەردە جۇمىس كەستەسىنەن 15-25 كۇنگە ارتتا قالۋشىلىق بار. اتاپ ايتقاندا، باتىس قازاقستان، اقتوبە، اقمولا جانە اتىراۋ وبلىستارىندا قۇرىلىس قارقىنى تومەن.
ۇكىمەت باسشىسى اكىمدەرگە ءاربىر نىسانعا ادامدار مەن تەحنيكا جۇمىلدىرۋدى تاپسىرىپ، پرەزيدەنت جۇكتەگەن مىندەتتەردى ورىنداۋ ءۇشىن شامامەن 2،5 اي قالعانىن ەسكە سالدى. بۇل رەتتە پرەمەر-مينيستر قۇرىلىس نورمالارىن بۇزۋعا جول بەرمەۋ كەرەكتىگىن تالاپ ەتتى.
«قالپىنا كەلتىرۋ جۇمىستارىنىڭ قارقىنىن جەدەلدەتۋ قاجەت. قۇرىلىس ماتەريالدارىن جەتكىزۋگە، ەڭبەك رەسۋرستارى مەن ارنايى تەحنيكانى الاڭداردا جۇمىلدىرۋعا بايلانىستى بارلىق ماسەلەنى جىلدام شەشۋ قاجەت. كەستەدەن كەشىگۋگە اكەلىپ سوعاتىن بارلىق پروبلەمالار تۋرالى دەرەۋ ورتالىققا حابارلاۋ كەرەك. قاجەت بولسا، ءبىز رەسۋرستاردى قايتا ءبولىپ، تەحنيكا مەن ادامداردى كوبەيتەمىز. بارلىق قۇرىلىس نورمالارى مەن قاۋىپسىزدىك تالاپتارىنىڭ ساقتالۋىن قامتاماسىز ەتۋ ماڭىزدى. بۇل ماسەلەلەر ازاماتتاردى الاڭداتپاۋى كەرەك. وڭىرلەردىڭ اكىمدەرى ۇيلەردىڭ ساپاسىنا جەكە جاۋاپ بەرەدى»، — دەپ اتاپ وتكەن ولجاس بەكتەنوۆ، ونەركاسىپ جانە قۇرىلىس مينيسترلىگىنە قۇرىلىس جۇمىستارىنىڭ ساپاسىن قاتاڭ باقىلاۋدى تاپسىردى.
پرەمەر-مينيستردىڭ تاپسىرماسى بويىنشا ونەركاسىپ جانە قۇرىلىس ءمينيسترى قانات شارلاپايەۆ، ەنەرگەتيكا جانە كولىك ۆيسە-مينيسترلەرى جۇمىس ۋاقىتىنىڭ نەگىزگى بولىگىن بارلىق جۇمىس اياقتالعانعا دەيىن وڭىرلەردە، تىكەلەي قۇرىلىس الاڭدارىندا وتكىزەتىن بولادى.
جەرگىلىكتى جولداردى جوندەۋگە جانە رەكونسترۋكسيالاۋعا ۇكىمەت رەزەرۆىنەن 22،7 ملرد تەڭگە ءبولىنىپ، زارداپ شەككەن وڭىرلەردەگى مەكتەپتەردى قالپىنا كەلتىرۋگە 7،5 ملرد تەڭگە باعىتتالدى. بارلىق مەكتەپ وقۋ جىلى باستالعانعا دەيىن قالپىنا كەلتىرىلەدى.
انىقتاما: زارداپ شەككەن ايماقتارداعى ۇيلەر 100% تەكسەرىلىپ، باعالاندى. باعالاۋ قورىتىندىسى بويىنشا 9 243 ءۇي جوندەۋگە جاتادى. جالپى سوماسى 44،1 ملرد تەڭگەگە 7505 وتباسى تۇرعىن ءۇيدى جوندەۋگە جانە قالپىنا كەلتىرۋگە وتەماقى الدى. 8 578 نىسان قالپىنا كەلتىرۋگە جارامايدى. بۇگىنگى تاڭدا 3 921 وتباسى قيراعان باسپاناسىنىڭ ورنىنا جاڭا ءۇي مەن پاتەر الدى، 2 578 جاڭا ءۇيدىڭ قۇرىلىسى جۇرگىزىلۋدە. 33 820 وتباسى 12،5 ملرد تەڭگەدەن استام سوماعا 100 اەك مولشەرىندە ءبىرجولعى تولەم الدى. زارداپ شەككەن تۇرعىنداردىڭ جوعالتقان اسا قاجەتتى زاتتارىن ساتىپ الۋ ءۇشىن 20 606 وتباسىنا 9،4 ملرد تەڭگە 150 اەك-كە دەيىنگى مولشەردە قوسىمشا وتەماقى تولەندى. سۋعا كەتكەن مالدىڭ وتەۋى ءۇشىن بەرىلگەن مەملەكەتتىك كومەك كولەمى 2،8 ملرد تەڭگەدەن استى. زارداپ شەككەن بيزنەسكە كەلتىرىلگەن زالالدى وتەۋ بويىنشا وڭىرلىك كوميسسيالار شوب سۋبەكتىلەرىنىڭ جالپى سوماسى 1،5 ملرد تەڭگە بولاتىن 178 ءوتىنىمىن قاراپ، ماقۇلدادى.
