QR Prezıdenti Qasym-Jomart Toqaevtyń agrarlyq sektordy turaqty túrde sýmen qamtamasyz etý boıynsha bergen tapsyrmasyn iske asyrý aıasynda Úkimet rezervinen Qyzylorda oblysynyń qajettilikteri úshin 53 jyljymaly dızeldi sorǵy stansasyn satyp alýǵa shamamen 1 mlrd teńge bólindi. QR Premer-mınıstri Oljas Bektenov tıisti qaýlyǵa qol qoıdy.

Mamandardyń esebinshe, jańa jabdyq magıstraldi arnalarda sý deńgeıi tómen bolǵan kúnniń ózinde 6 myńnan astam gektar jerdi sýaryp turýǵa múmkindik beredi. Sorǵy stansalary magıstraldi jáne sharýashylyqtar aralyǵyndaǵy arnalardan ishki sharýashylyq jelilerine sý jiberý úshin qoldanylady.

Óńirde 126,4 myńnan astam gektar jerge sýarmaly egin egilgen, onyń 82,4 myń gektary kúrish. Aǵymdaǵy sýarý maýsymynda josparlanǵan sý kólemi 2,5 mlrd tekshe metr quraıdy.

Qyzyloda oblysy ákimdigi «Qazsýshar» RMK-niń Qyzylorda fılıalymen birlese arnaıy monıtorıń tobyn jasaqtap, Syrdarıadan kelip jatqan sý kólemine sáıkes, bes magıstraldi jáne úsh sharýashylyqtar aralyǵyndaǵy arnalarǵa sý berý kestesin ázirlep, bekitti.

Qyzylorda oblysynyń agroónerkásiptik kesheni transshekaralyq sý resýrstaryna tikeleı táýeldi ekenin eskere otyryp, óńirdi turaqty túrde sýmen qamtamasyz etip, astyq ónimdiligin jáne azyq-túlik qaýipsizdigin saqtaý memlekettiń basty mindeti bop qalady.