QR qarjy vitse-ministri Erjan Birjanov Qostanai oblysynyń biznes-qoǵamdastyǵymen kezdesý ótkizdi, onda salyq reformasy talqylandy. Kezdesýge ekonomikanyń túrli salasynda jumys isteitin kásipkerler men óńirdiń 8 salalyq keńesiniń músheleri qatysty, dep habarlaidy Dalanews.kz.
Vitse-ministr Qazaqstandaǵy QQS mólsheri álemdegi eń tómenderiniń biri ekenin atap ótti, sondai-aq QQS tóleýshiler sheńberin keńeitý biznes úshin teń básekelestik jaǵdailardy qalyptastyrýǵa múmkindik beredi.
Salyq reformasyndaǵy ózgerister búkil halyqtyń múddesine áser etetindikten, qazirgi ýaqytta biznes-sarapshylardyń qatysýymen belsendi talqylaý júrgizilip jatyr. Qostanailyq kásipkerler salyq reformasyna utymdy ári teńgerimdi kózqaras qalyptastyrý úshin jergilikti deńgeide konstrýktivti dialogtyń mańyzdylyǵyn atap ótti.
Talqylaý barysynda kóterilgen negizgi máselelerdiń biri – QQS mólsherlemesin ózgertý boldy. Oblystyq Qurylysshylar qaýymdastyǵynyń atqarýshy direktory Irina Vikýlova qurylys salasy boiynsha qurylys kompaniialary men jobalaýshylarǵa salyqtyń saralanǵan tásilin qoldaný qajettigin atap ótti.
Sondai-aq kásipkerler qurylys salasyn qoldaý sharalaryn, onyń ishinde ekinshi deńgeili bankterde nesieler boiynsha jeńildetilgen mólsherlemelerdi qarastyrý múmkindigin talqylaýdy surady.
Saýda salasynyń ókilderi biznesti shaǵyn, orta jáne iri sanattarǵa bólýge qatysty taǵy bir mańyzdy usynys engizdi. Bul usynysty "Nov LTD" JShS direktory Natalia Lapshina jetkizdi.
"Ókinishke qarai, bul jikteý qazirgi ekonomikalyq jaǵdaidy tolyqtai kórsetpeidi jáne kásipkerliktiń damýyna kedergi keltiredi. Mysal retinde kóterme jáne bólshek saýda kásiporyndaryn aitýǵa bolady. Olar ekonomikanyń damýy men jumys oryndaryn qurýǵa eleýli úles qosqanyna qaramastan, ónerkásiptik alpaýyttarmen birdei "iri kompaniialar" sanatyna jatqyzylady. Alaida mundai kásiporyndardyń tabysy jyldyq jiyntyq kiristiń nebári 5-10%-ynan aspaidy", — dep atap ótti Natalia Lapshina.
Saýda ókilderi orta jáne iri biznes úshin shekti mándi arttyrý boiynsha usynystar engizdi.
Sonymen qatar kásipkerler quqyq buzýshylyqtyń aýyrlyǵy men biznes kólemine qarai aiyppuldardy saralaý jóninde usynys aitty.
Qazaqstannyń Jumyrtqa óndirýshiler qaýymdastyǵynyń prezidenti Qairat Maishev agroónerkásiptik keshen el ekonomikasynyń negizgi salalarynyń biri ekenin jáne salyq zańnamasyndaǵy kez kelgen ózgerister onyń damýyna tikelei áser etetinin aitty. Jańa salyqtyq bastamalar agrarshylardy ósim, jańǵyrtý jáne básekege qabilettiligin arttyrýǵa qosymsha yntalandyra alady.
Keńes barysynda kásipkerler ózderin alańdatqan suraqtaryn qoiyp, salyq saiasatyna kez kelgen ózgeris engizý kezinde biznes-qoǵamdastyqtyń pikirin eskerý qajettigin erekshe atap ótti. Óz kezeginde Úkimet barlyq usynysty jan-jaqty zerttep, muqiiat qarastyratynyn jetkizdi.
