2025 jylǵy negizgi UBT-ǵa ótinishterdi qabyldaý 12 sáýirde bastalyp, 25 sáýirge deıin jalǵasady, dep habarlaıdy Dalanews.kz
Ótinish berý kezeńi eki kezeńge bólinedi:
- 12-18 sáýir aralyǵynda bir ret ótinish berýge;
- 19-25 sáýir aralyǵynda bir nemese eki ret ótinish berýge bolady.
Al testileý 16 mamyrda bastalyp, 5 shildege deıin jalǵasady. Talapkerler negizgi UBT-ny eki ret tapsyryp, eń úzdik nátıjemen grant konkýrsyna qatysa alady.
Ótinishti qaıda tapsyrý kerek?
UBT-ǵa qatysý úshin Ulttyq testileý ortalyǵynyń http://app.testcenter.kz saıty nemese UTO.kz qosymshasy arqyly ótinish berýge bolady. Talapkerler testileý kúnin, ýaqytyn jáne pýnktin ózderi tańdaıdy. Bul rette olar eki múmkindik úshin beıindik pánderdiń bir ǵana kombınasıasyn belgileıdi.
Talapkerlerdiń negizgi UBT-ǵa daıyndyǵyn jaqsartý maqsatynda engizilgen ár pán boıynsha jeke taqyryptyq taldaý bar. Iaǵnı ár UBT-dan keıin (qańtar, naýryz) túlekterge jeke taqyryptyq taldaý boıynsha bilimderin arttyrý usynylady. Sonymen qatar birinshi múmkindikti tapsyrǵannan keıin olar ekinshi múmkindikke deıin daıyndyqtaryn jaqsarta alady. Odan bólek onlaın baıqaý synaqtary iske qosylǵan. Oqý jylynyń basynda UTO saıtynda test tapsyrmalary qurastyrylǵan oqýlyqtar tizimi men test jospary; «Qazaqstan tarıhy» jáne «Dúnıejúzi tarıhy» pánderi boıynsha 100 tarıhı data tizimi; «Informatıka» páninen termınder tizimi; «Qazaq ádebıeti» jáne «Orys ádebıeti» boıynsha ádebı shyǵarmalar tizimi jarıalandy.
UBT-da qansha tapsyrma beriledi?
UBT-daǵy pánderdiń sany ózgerissiz qalady, ıaǵnı úsheýi mindetti jáne ekeýi tańdaý boıynsha. UBT tapsyrmalar sany – 120. Onyń ishinde «Qazaqstan tarıhynan» 20 tapsyrma, «Oqý saýattylyǵynan» 10 tapsyrma, «Matematıkalyq saýattylyqtan» 10 tapsyrma jáne eki beıindik pán boıynsha 40 tapsyrmadan. Joǵary bal – 140.
UBT qansha ýaqytqa sozylady?
Testileý ýaqyty – 4 saǵat (240 mınýt). Bul rette erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalatynyn aıta ketý kerek.
Akademıalyq adaldyqty qamtamasyz etý maqsatynda UBT-ǵa qatysýshy ár adam jeke jasalǵan test nusqasyn alady. Emtıhan kezinde testileý baǵdarlamasynda kálkýlátor, hımıalyq elementterdiń perıodtyq júıesi jáne tuzdardyń erigishtik kestesi qoljetimdi bolady. Sonymen qatar talapkerlerge yńǵaıly bolý úshin kestelerdiń qaǵaz nusqalary da beriledi.
Apelásıany testileý aıaqtalǵannan keıin 30 mınýt ishinde berýge bolady. Sertıfıkat apelásıa qaralǵannan keıin testilenýshiniń jeke kabınetinde qoljetimdi bolady.
Oqýǵa túsý úshin shekti bal qandaı?
Shekti baldar ózgerissiz qaldy: «Quqyq» jáne «Pedagogıkalyq ǵylymdar» baǵyttaryna túsý úshin keminde 75 bal, «Densaýlyq saqtaý jáne áleýmettik qamtamasyz etý (medısına)» úshin keminde 70 bal jınaý qajet; ulttyq JOO-na túsý úshin keminde 65 bal, basqa JOO-na túsý úshin keminde 50 bal jınaý qajet.
Eske salaıyq, 2025 jylǵy UBT aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi. Tyıym salynǵan zattardy paıdalaný nemese basqa da erejelerdi buzý faktileri anyqtalǵan jaǵdaıda, talapkerdiń UBT nátıjeleri joıylady.
