Úlken tragedıany basynan ótkizip otyrǵan otbasy jan jarasymen bólisip, 23 adam sottalyp jatqan qylmystyq istiń artynda tur dep esepteıtin adamdardyń da attaryn atap berdi. Eks-mınıstrge taǵylǵan barlyq aıyptardy eskere otyryp, áriptesim Gúlbaný Ánıatqyzy ata-anasynan eksklúzıvti suhbat alǵan edi, dep habarlaıdy 31 arna.
Qýandyq Bıshimbaev Ulttyq ekonomıka mınıstri bolǵan tusta isti bolyp, tergeý abaqtysyna qamaýǵa alynǵan 10 aıdan beri kúndiz kúlkiden, túnde uıqydan aıyrylǵan ata-anasy arnaǵa suhbat berýge uzaq oılanyp baryp kelisti. Jalǵyz uldarynyń isine qatysty erteń bastalatyn sot aldynda bizben Astanadaǵy tynysh kafelerdiń birinde kezdesti.
Aıta keteıik, eks-mınıstr Qýandyq Bıshimbaevqa 7 bólip, 346 mıllıon teńge para aldy jáne Qyzylordadaǵy áınek zaýytynyń qurylysyna bólingen 1 mıllıard 200 mıllıon teńgeni jymqyrdy degen aıyptar taǵylǵan.
Ulttyq búronyń málimetinshe, «Bolashaqtyń» túlegi bul iske qaramaǵyndaǵylarmen birge týǵan bólesin de tartqan. Osy is boıynsha aıyptalǵan 23 kúdiktiniń 20-sy kinásin moıyndasa, Bıshimbaev bastaǵan úsheýi ǵana kelispeı otyr.
Kinálaryn moıyndaǵandar arasynda «Báıterek –Development» basshysy bolǵan Baqyt Jaqsybaev, onyń burynǵy orynbasary, Májilis depýtaty Qabıbolla Jaqypovtyń uly Aslan Jaqypov bastaǵan 20 adam bar.
“Ulymdy túrmege japqan soń basqasha saırap shyǵady. Qýandyqqa qatysty aqsha jaıly aıta bastaıdy”, – deıdi anasy Almıra Nurlybekova.
Al, aıybyn moıyndaýdan bas tartqan Bıshimbaevqa tergeý abaqtysynda aılap psıhologıalyq qysym kórsetildi deıdi.
Eks-mınıstr adam zorlaǵan kúdiktimen birge jatyp, tańǵy 6-dan túngi 10-ǵa deıin tar bólmede jatpaq túgili, otyrýǵa bolmaıtyn abaqty azabyn da tartqan. Álpeshtep ósirgen jalǵyz balasynyń jaıyn aıtqanda anasy kóz jasyn toqtata almady.
Bir jylǵa jýyq sary ýaıymǵa salynǵan burynǵy Májilis depýtaty bolǵan ákesi otbasylyq tragedıany kótere almaı júregine ota jasatypty. Qýandyqty aınalasyndaǵylar satyp ketti degen Ýálıhan Bıshimbaevtan balasynyń eń úlken ókinishin de suradyq.
“Onyń eń úlken ókingeni – elbasynyń seniminen shyǵa almaǵany. Basqasyn alyp qoıǵanda birinshi orynda elbasy, ol kisiniń senimi. Árıne bul januıamyzǵa ata anaǵa Qýandyqtyń ózine úlken tragedıa mundaıdy kútpegen edi”, – deıdi Qýandyq Bıshimbaevtyń ákesi Ýálıhan Bıshimbaev.
Abaqtynyń azaby men dúıim jurtqa mıllıardtardy jep qoıdy dep aty shyqqanyna kúıingen ulymyzdyń shashy aǵaryp, qan qysymy kóterile bastady deıdi ata-anasy. Tórt balasynyń úlkeni aldaǵy jyly mekteppen qoshtassa, eń kishkentaı tórttegi qyzy «ákem qashan keledi» dep kúnde suraıdy eken.
“Balalary saǵynady. Tórttegi qyzy jylaıdy, ákem qashan keledi dep. Ákem qarańǵyda otyr dep jylaıdy”, – deıdi anasy.
Bilim qýǵandardyń otbasynan shyqqan, úsh dıplomy bar Qýandyqtyń atynda Ulttyq búro aıtqandaı Qosshyda mıllıondarǵa salynǵan úıi joq, deıdi anasy. Aıtýynsha, ol qurylysy bitpegen monsha eken. Al, uldarynyń isti bolýyna «Shyny koroli» atymen shyqqan Murathan Toqmádıdiń qatysy bolýy múmkin dep tuspaldaıdy.
Aıtpaqshy, aıyptaryn moıyndaǵan birneshe kúdikti sottan bosap shyqsa, ata-anasy tańqalmaımyz dep otyr. Al, kimniń aq, kimniń kináli ekenin sot anyqtaıdy.
