ۇلكەن تراگەديانى باسىنان وتكىزىپ وتىرعان وتباسى جان جاراسىمەن ءبولىسىپ، 23 ادام سوتتالىپ جاتقان قىلمىستىق ءىستىڭ ارتىندا تۇر دەپ ەسەپتەيتىن ادامداردىڭ دا اتتارىن اتاپ بەردى. ەكس-مينيسترگە تاعىلعان بارلىق ايىپتاردى ەسكەرە وتىرىپ، ارىپتەسىم گۇلبانۋ ءانيات قىزى اتا-اناسىنان ەكسكليۋزيۆتى سۇحبات العان ەدى، دەپ حابارلايدى 31 ارنا.
قۋاندىق بيشىمبايەۆ ۇلتتىق ەكونوميكا ءمينيسترى بولعان تۇستا ءىستى بولىپ، تەرگەۋ اباقتىسىنا قاماۋعا الىنعان 10 ايدان بەرى كۇندىز كۇلكىدەن، تۇندە ۇيقىدان ايىرىلعان اتا-اناسى ارناعا سۇحبات بەرۋگە ۇزاق ويلانىپ بارىپ كەلىستى. جالعىز ۇلدارىنىڭ ىسىنە قاتىستى ەرتەڭ باستالاتىن سوت الدىندا بىزبەن استاناداعى تىنىش كافەلەردىڭ بىرىندە كەزدەستى.
ايتا كەتەيىك، ەكس-مينيستر قۋاندىق بيشىمبايەۆقا 7 ءبولىپ، 346 ميلليون تەڭگە پارا الدى جانە قىزىلورداداعى اينەك زاۋىتىنىڭ قۇرىلىسىنا بولىنگەن 1 ميلليارد 200 ميلليون تەڭگەنى جىمقىردى دەگەن ايىپتار تاعىلعان.
ۇلتتىق بيۋرونىڭ مالىمەتىنشە، «بولاشاقتىڭ» تۇلەگى بۇل ىسكە قاراماعىنداعىلارمەن بىرگە تۋعان بولەسىن دە تارتقان. وسى ءىس بويىنشا ايىپتالعان 23 كۇدىكتىنىڭ 20-سى كىناسىن مويىنداسا، بيشىمبايەۆ باستاعان ۇشەۋى عانا كەلىسپەي وتىر.
كىنالارىن مويىنداعاندار اراسىندا «بايتەرەك –Development» باسشىسى بولعان باقىت جاقسىبايەۆ، ونىڭ بۇرىنعى ورىنباسارى، ءماجىلىس دەپۋتاتى قابيبوللا جاقىپوۆتىڭ ۇلى اسلان جاقىپوۆ باستاعان 20 ادام بار.
“ۇلىمدى تۇرمەگە جاپقان سوڭ باسقاشا سايراپ شىعادى. قۋاندىققا قاتىستى اقشا جايلى ايتا باستايدى”، – دەيدى اناسى الميرا نۇرلىبەكوۆا.
ال، ايىبىن مويىنداۋدان باس تارتقان بيشىمبايەۆقا تەرگەۋ اباقتىسىندا ايلاپ پسيحولوگيالىق قىسىم كورسەتىلدى دەيدى.
ەكس-مينيستر ادام زورلاعان كۇدىكتىمەن بىرگە جاتىپ، تاڭعى 6-دان تۇنگى 10-عا دەيىن تار بولمەدە جاتپاق تۇگىلى، وتىرۋعا بولمايتىن اباقتى ازابىن دا تارتقان. الپەشتەپ وسىرگەن جالعىز بالاسىنىڭ جايىن ايتقاندا اناسى كوز جاسىن توقتاتا المادى.
ءبىر جىلعا جۋىق سارى ۋايىمعا سالىنعان بۇرىنعى ءماجىلىس دەپۋتاتى بولعان اكەسى وتباسىلىق تراگەديانى كوتەرە الماي جۇرەگىنە وتا جاساتىپتى. قۋاندىقتى اينالاسىنداعىلار ساتىپ كەتتى دەگەن ءۋاليحان بيشىمبايەۆتان بالاسىنىڭ ەڭ ۇلكەن وكىنىشىن دە سۇرادىق.
“ونىڭ ەڭ ۇلكەن وكىنگەنى – ەلباسىنىڭ سەنىمىنەن شىعا الماعانى. باسقاسىن الىپ قويعاندا ءبىرىنشى ورىندا ەلباسى، ول كىسىنىڭ سەنىمى. ارينە بۇل جانۇيامىزعا اتا اناعا قۋاندىقتىڭ وزىنە ۇلكەن تراگەديا مۇندايدى كۇتپەگەن ەدى”، – دەيدى قۋاندىق بيشىمبايەۆتىڭ اكەسى ءۋاليحان بيشىمبايەۆ.
اباقتىنىڭ ازابى مەن ءدۇيىم جۇرتقا ميللياردتاردى جەپ قويدى دەپ اتى شىققانىنا كۇيىنگەن ۇلىمىزدىڭ شاشى اعارىپ، قان قىسىمى كوتەرىلە باستادى دەيدى اتا-اناسى. ءتورت بالاسىنىڭ ۇلكەنى الداعى جىلى مەكتەپپەن قوشتاسسا، ەڭ كىشكەنتاي تورتتەگى قىزى «اكەم قاشان كەلەدى» دەپ كۇندە سۇرايدى ەكەن.
“بالالارى ساعىنادى. تورتتەگى قىزى جىلايدى، اكەم قاشان كەلەدى دەپ. اكەم قاراڭعىدا وتىر دەپ جىلايدى”، – دەيدى اناسى.
ءبىلىم قۋعانداردىڭ وتباسىنان شىققان، ءۇش ديپلومى بار قۋاندىقتىڭ اتىندا ۇلتتىق بيۋرو ايتقانداي قوسشىدا ميلليوندارعا سالىنعان ءۇيى جوق، دەيدى اناسى. ايتۋىنشا، ول قۇرىلىسى بىتپەگەن مونشا ەكەن. ال، ۇلدارىنىڭ ءىستى بولۋىنا «شىنى كورولى» اتىمەن شىققان مۇراتحان ءتوقماديدىڭ قاتىسى بولۋى مۇمكىن دەپ تۇسپالدايدى.
ايتپاقشى، ايىپتارىن مويىنداعان بىرنەشە كۇدىكتى سوتتان بوساپ شىقسا، اتا-اناسى تاڭقالمايمىز دەپ وتىر. ال، كىمنىڭ اق، كىمنىڭ كىنالى ەكەنىن سوت انىقتايدى.
