Jambyl oblysynyń kókparshylary eki jyl buryn ýáde etilgen aqshalai syiaqyny áli kúnge deiin ala almai júr. Bul týraly sport jýrnalisi Aslan Qajenov áleýmettik jelidegi paraqshasynda jazdy, dep habarlaidy dalanews.kz.
Onyń aitýynsha, Astanada ótken V Dúniejúzilik kóshpendiler oiyndarynan keiin Jambyl oblysynyń ákimi el namysyn qorǵaǵan kókparshylarǵa milliondaǵan teńgeniń sertifikattaryn tabystaǵan. Alaida sportshylarǵa kórsetilgen qarajat áli tólenbegen.
"Bul foto osydan eki jyl buryn túsirildi. Astanada ótken Kóshpendiler oiyndarynan keiin Jambyl oblysynyń ákimi el namysyn qorǵaǵan kókparshylarǵa million teńgelik sertifikat ustaǵan. Árqaisysyna. Jigitter syiaqyny áli kúnge deiin almady. Qazir endi dál osy sportshylardy jerden alyp, jerge salyp jatyrmyz. Bilesizder me? Olar 190–240 myń teńge ǵana ailyq alady. Sonymen otbasylaryn asyraidy. Al mundai bairaqty básekelerde taza namys úshin shabady. Qysqasy, ýáde qashan oryndalady, ákim myrza?!" – dep jazdy Aslan Qajenov.
Sport jýrnalisi kókparshylardyń ai saiyn alatyn jalaqysy 190–240 myń teńge shamasynda ekenin atap ótti. Onyń sózinshe, sportshylar iri jarystarda qarjylai tabystan buryn el namysy úshin óner kórsetedi.
Ázirge Jambyl oblysynyń ákimdigi sport jýrnalisiniń jazbasyna qatysty resmi túsinikteme bermedi.
