Atyraý oblysynda belgili kásipker Timýr Qulybaev basqaratyn "Kipros" JShS-ne tiesili jer telimi memleket menshigine qaitaryldy. Bul týraly óńirlik prokýratýra málimdedi, dep habarlaidy Dalanews.kz.
Kompaniia bul aýmaqty pirs salý maqsatynda alǵanymen, joba júzege aspaǵan. Nátijesinde, aýmaǵy 3,46 gektar bolatyn jer telimi memleketke qaitaryldy. Saraptamaǵa sáikes, jer quny 250 million teńge dep baǵalanǵan.
"Qadaǵalaý aktileri negizinde jalpy aýmaǵy 31 432 gektardy quraityn, quny 196 million teńge bolatyn 16 igerilmegen jer telimi memleketke qaitaryldy", – dedi prokýratýra ókilderi.
Eske salaiyq, buǵan deiin Timýr Qulybaevqa tiesili dep sanalatyn «TEK-Kazahstan» kompaniiasy memleket menshigine 54 nysandy ótkizgen edi. Bul týraly bas kólik prokýratýrasy habarlady.
Usynylǵan aqparatqa sáikes, quramyna janarmai qoimalary, ǵimarattar men qurylystar, sondai-aq negizgi qural-jabdyq toptary kiretin múlik endi memleketke tiesili. Sonymen birge «Qorǵas» halyqaralyq ortalyǵyndaǵy bagaj terminaly men jer ýchaskesi de qaitarylǵan.
Buǵan deiin Aaktivterdi qaitarý jónindegi komitet Timýr Qulybaevpen sottasyp jatqany týraly aqparat taraǵan edi. Atalǵan kásipkerdiń esimi eldegi eń yqpaldy biznes ókilderiniń biri retinde jii atalady. Ol «Kipros» pen «Joint Technologies» arqyly «TEK-Kazahstan»-dy qadaǵalaǵan dep aitylady.
Qarjy esebine súiensek, Qulybaevtyń Joint Resources holdingi 2023 jyldyń qorytyndysynda 39,1 mlrd teńge taza tabys tapqan. Bul kompaniia negizinen aktivterdi basqarýmen ainalysady. Holdingtiń qaramaǵynda jeti enshiles mekeme bar, olardyń arasynda «Kristall Menedjment» AQ, «Kazakhstan’s mineral resource investment company» JShS, «Shubarkól Premiým» AQ sekildi kásiporyndar jáne basqa da uiymdar kezdesedi.
Memleketke qaitarylǵan 54 nysannyń naqty qandai maqsatta paidalanylatyny áli belgisiz. Degenmen, sarapshylar mundai qadam elimizde aktivterdi zańǵa sáikes retteý jáne menshik qatynastarynyń ashyqtyǵyn arttyrý baǵytynda jasalyp jatqanyn aitady. Quzyrly organdar bul protsestiń jalǵasatynyn, al qajetti jaǵdaida sot sheshimine júginetinin eskertýde.
