Oblys ákimi aldymen, Kóksáıek aýyldyq okrýgindegi «Keremet agro Group» aýylsharýashylyq óndiristik kooperatıviniń jumysymen tanysty. Kooperatıv 2017 jyly 40 ga jerge qarqyndy alma baýyn ekken. Osy jumystar úshin 503 mln. teńge kóleminde ınvestısıa tartqan. Sharýashylyqqa qajetti tehnıkany "Yrys" MQU arkyly 43 mln. 100 myń teńgege lızıń boıynsha qarjylandyrǵan. Aýylsharýashylyq óndiristik kooperatıviniń tóraǵasy – Ozyqbaı Abzal Meırambekuly. «Gala», «Golden delıshes», «Aıdared» jáne «Red delıshes» atty almanyń suryptary egilgen baýda 87500 dana túp aǵash bar. Kooperatıvte 50 adam turaqty jumys isteıdi. Ortasha aılyq jalaqysy – 90 myń teńge.
Munan keıin oblys ákimi Tasaryq aýylynda ornalasqan jeke kásipker S.Tanabaevtyń júzim sharýashylyǵynda boldy. Kásipker tastaq jerdi tıimdi paıdalanyp, 2016 jyly jańa tehnologıamen 10 gektarǵa júzim ekken. Al, 2017 jyly qosymsha 10 gektar jerge 16 myń túp kóshet otyrǵyzdy. Sharýashylyqqa qarasty 20 gektarǵa jalpy sany 32 myń túp «Taıfı-Rozovyı» júzimi egilgen. Beton tireýishter ornatyp, tamshylatyp sýarý júıesin qoldanǵan. Kóshetterdi Saryaǵash aýdanynan aldyrǵan. Jobanyń jalpy ınvestısıalyq quny – 50 mln. teńge. Bul qarjynyń teń jartysyn «Damý» baǵdarlamasy aıasynda «Ońtústik» aımaqtyq ınvestısıa ortalyǵy bólgen. Qojalyq basshysy 10 gektar jerdi satyp alsa, 10 gektar jerdi memleketten 49 jylǵa jalǵa alǵan. Júzim alqabynyń ár gektaryna memleket tarapynan 750 myń teńgeden sýbsıdıa berildi. Júzimbaq bıyl alǵashqy ónimin bere bastaıdy. Gektaryna 35-40 tonnadan ónim beredi dep kútilýde. Búginde júzimbaqta 10 adam turaqty eńbek etip jatyr. Jalaqylary ortasha eseppen 50 myń teńgeni quraıdy. Al, maýsymdyq jıyn-terim mezgilinde munda 20-ǵa jýyq adam jumysqa tartylady. Sharýa qojalyǵy aldaǵy jyldary júzimdi qaıta óńdeý isin qolǵa alyp, júzimbaqqa jaqyn mańnan kókónis saqtaý qoımasynyń qurylysyn bastamaq.
İsker sharýalardyń jumysymen tanysqan óńir basshysy jemis-jıdekti óńdeý máselesin qolǵa alý kerektigin aıtty.
– Eýropa elderinde 10-15 gektar jeri bar sharýalar tek daıyn ónimdi satyp qoımaı, jemis-jıdek pen kókónisti óńdeıdi. Osy arqyly tabys molyraq túsedi. Máselen, alma, júzim saqtaıtyn qoımalar men ony óńdep túrli sýsyndar shyǵaratyn kásiporyn salsańyzdar tıimdirek bolady. Jalpy, Tólebı aýdanynda jumystar atqarylyp jatyr. Byltyr kópqabatty 8 úı turǵyndarǵa berildi. Bul – aýdan tarıhynda buryn bolmaǵan oqıǵa. Aýdandaǵy eldi mekenderdiń 94 paıyzy aýyz sýmen qamtyldy. 14 eldi mekenge, ıaǵnı, 5000 úıge gaz berildi. Gazdandyrý jumystary aldaǵy ýaqytta da jalǵasyn tabady. Joldar salynyp jatyr. Kanaldar tazalanyp, sýarmaly jer kóbeıdi. Osy baǵyttan aınymaı, kásipkerlikti, aýyl sharýashylyǵyn jandandyra túsý kerek, – dedi Janseıi Túımebaev.
