Túrkistan oblysy ákiminiń orynbasary Arman Sábitovtyń tóraǵalyǵymen ótken otyrysta salanyń jyl basynan bergi jumys nátijeleri týraly oblystyq Qoǵamdyq densaýlyq basqarmasynyń basshysy Marat Pashimov baiandady.
Byltyr óńirdiń densaýlyq saqtaý salasyna 13,7 mlrd teńge baǵyttaldy. Basqarma basshysynyń aitýynsha, birinshi kezekte ana men bala, jansaqtaý, ota jasaý jáne jedel járdem qyzmetin kúsheitýge maqsat qoiylǵan.
Meditsinalyq uiymdardyń materialdyq-tehnikalyq bazasyn jabdyqtaý maqsatynda 2,5 mlrd teńgege 205 dana meditsinalyq tehnika satyp alynyp, jabdyqtaý 79.2 paiyzdy kórsetti. Memlekettik-jekeshelik áriptestik tetigi arqyly 9 feldsherlik ambýlatoriianyń qurylysy júrgizilip, onyń 5-ýi paidalanýǵa berilse, biyl tórteýi ashylady.
Sonymen qatar, jedel meditsinalyq kómek qyzmeti 122 birlik avtokólik satyp alý arqyly kúsheitildi, bul kólikter jedel járdem parkin jańartýǵa múmkindik berdi. Aimaqta dárigerlerdiń biliktiligin arttyrýǵa úzdiksiz erekshe kóńil bólinip keledi.
Jalpy elimizde vaktsina alý boiynsha Túrkistan oblysy Almaty, Qaraǵandy oblystarynan keiin úshinshi orynda tur. Óńirde ekpe salatyn 80 pýnkt uiymdastyrylǵan. 43 myńnan astam adam qaterli indetke qarsy ekpeni qabyldady.
