Tanymal rejisser Ermek Tursynov mamyr aiyna josparlanǵan eki birdei kezdesýiniń belgisiz sebeppen ótpeitinin habarlady. Bul týraly rejisser óziniń áleýmettik jelidegi paraqshasynda jazdy, dep habarlaidy Dalanews.kz.
Almaty teatrynda 22 mamyr kúni rejisserdiń tanymal ázilkesh Nurlan Sabýrovpen birge «Dialog» atty is-sharasy, al 31 mamyr kúni kompozitor Erkesh Shákeevpen birlesken kontserti ótýge tiis bolǵan. Sońǵysy saiasi qýǵyn-súrgin jáne asharshylyq qurbandaryn eske alýǵa arnalǵan edi.
Ermek Tursynov eki is-sharanyń da teatr basshylyǵy tarapynan birjaqty toqtatylǵanyn atap ótti.
«22 mamyrdaǵy «Dialog» kezdesýi nege toqtatylǵany týraly teatr esh túsinikteme bermedi. Al 31 mamyrda josparlanǵan kontsertti ótkizbeýdiń sebebin tehnikalyq jaǵdailarmen túsindirip, resmi hat joldapty. Bul jaǵdaiǵa qatysty óz oiymdy keiin aitamyn. Qazirshe kórermenimnen bolǵan jait úshin keshirim suraimyn», – dedi Tursynov.
Kompozitor Erkesh Shákeev te buǵan deiin 31 mamyrdaǵy kontserti ótkizilmeitinin málimdegen bolatyn. Onyń sózinshe, bilet satatyn «FreedomTicketon» saity esh eskertpesten satylymdy toqtatqan. Sondai-aq, «Almaty Theatre» aldyn ala tólem jasalyp, kelisimshartqa qol qoiylǵanyna qaramastan, kontsertti ótkizýge aýyzsha túrde tyiym salǵan.
Shákeev atap ótken taǵy bir jait – Almaty qalasy Mádeniet basqarmasynan kútpegen jerden uiymdastyrýshylarǵa shaǵym túskeni. Basqarma shara týraly ózderine habarlama berilmegenin aityp, narazylyq tanytqan.
Eske sala keteiik, Qazaqstanda 31 mamyr – Saiasi qýǵyn-súrgin jáne asharshylyq qurbandaryn eske alý kúni. Bul data 1997 jyly arnaiy belgilengen bolatyn. Resmi derekter boiynsha HH ǵasyrdyń 20–50 jyldar aralyǵynda elimizde 100 myńnan asa adam repressiiaǵa ushyrap, olardyń 25 myńǵa jýyǵy atylǵan. Asharshylyq jyldarynda 1,5 millionnan asa qazaq qaza tapqan.
Osy kezeńde Alash qozǵalysynyń kósemderi Álihan Bókeihan, Ahmet Baitursynuly, Mirjaqyp Dýlatov, Nyǵmet Nurmaqov, Temirbek Júrgenov sekildi kóptegen tanymal tulǵa repressiia qurbany boldy.
