91 keli salmaqtaǵy básekeniń finalyna qatysty oi bildirgen Edilov jekpe-jek barysynda Levitten de, Qazaqstan boks federatsiiasy basshylyǵynan da qate ketti dep esepteidi.
– Rasynda, keshe daý týdyratyndai kezdesý boldy. Levit óte las judyryqtasty. Asyqpai qaraityn bolsańyzdar, ol tópelep urǵanymen, barlyq soqqysyn daryta alǵan joq. Iaǵni, kózge uryp turatyn salmaqty soqqylar bolmady. Qansha aitqanmen, bul Olimpiadanyń finaly ǵoi. Mundai jaǵdailardyń bolýy múmkin ekenin sezdik. Bizdiń basshylyq qaida qarap otyr? Erterek qimyldaýy kerek edi, – dedi burynǵy bas bapker.
Tursynǵali Edilovtiń aitýynsha, Qazaqstan quramasynyń bapkerleri men federatsiia basshylary Qairat Eráliev ádiletsiz jeńilgende-aq appeliatsiialyq shaǵym berip, tóreshilerdi qyspaqqa alýy tiis edi.
– Eger Qairat Erálievtiń jeńilisinen soń dereý qimyldasaq, tóreshiler aiaq tartatyn edi. Kelesi jekpe-jekterde bizdiń boksshylardy qyspaqqa almaityn edi. Sodan soń, Levittiń kezdesýi de mundai daýǵa ainalmas pa edi?! – deidi Edilov.
– Shyny kerek, boksshylarymyzǵa ózbekten jeńilme deitinimiz ras. Biraq on jerden qarsylas bolsaq ta, ózbek boksshylarynyń qazirgi qarqynyna súisinip otyrmyn. Kórdińder me, sharshy alańda janyn berip jatyr olar. Ár kezdesýine quddy bir sońǵy jekpe-jegine shyqqandai jigermen attanady. Men ózbek boksshylaryn moiyndadym. Olardyń barlyǵy jas, 1997-98 jylǵy jigitter. Tek Elshod Rasýlov qana úlken shyǵar. Al bizde she? Júsipov pen Álimhanulynan basqalary zeinetke ketetin boksshylar. Bizde ulttyq qurama boksshylarynyń ornyn basatyn býyn bar ma ózi? Joq. Qazirgi quram jigitteriniń kópshiligi bokspen qoshtasady, al bizde eshkim joq olardy almastyratyn... Bizdiń bokshylar aldaǵy 3-4 Olimpiadada ózbek qarsylastarynan oza almaidy endi. Ózbekterden áli talai utylamyz, – dedi Tursynǵali Edilov.
Búginde Almaty oblysynda jattyqtyrýshy bolyp qyzmet etetin Edilov Jánibek Álimhanulynyń jeńilisin de túsindirip ketti.
– Bul jerde meniń de qateligim bar. Jánibekke telefon soǵyp, ózbek, kýbalyq qarsylastary týraly aita berdim. Iaǵni, Álimhanuly tek altyn medal týraly oilap, oǵan baratyn joldyń ońai bolmaitynyn umytyp ketti. Ázirbaijan sportshysynan taza utyldy ol. Uiyqtap júrdi de, tek úshinshi raýndta oiandy. Ol qarsylasyn baǵalaǵan da joq. Tek osy salmaqtaǵy myqtylarǵa ǵana daiyndala bergen. Al Olimpiadada ońai berile salatyn qarsylas joq, – dedi bapker.
– Osy Birjandy Olimpiadaǵa nege aparǵanyn bilmeimin. Jaqypov osyǵan deiingi Olimpiada oiyndarynda júldege iligip pe edi?! Bul salmaqta basqa sportshy joq dep aitady únemi. Sonda 3 olimpiadalyq tsikl, 12 jyl ishinde 49 kelide judyryqtasatyn bir jigit shyqpady ma bizden?! Jalpy, ulttyq quramada bas bapkerdiń shákirtteri bolmaýy kerek, – dedi Tursynǵali Edilov.
Eske sala keteiik, Tursynǵali Edilov 2000 jylǵy Sidnei Olimpiadasyndaǵy qazaq boksshylarynyń jeńisine birden-bir sebepker tulǵa. Ol bas bapkerlik etken jyldary Sidnei Olimpiadasyna qatysqan 7 qazaq boksshysynyń tórteýi finalǵa shyqqan bolatyn. Mundai tabys qazaq boksynda áli qaitalanǵan joq.
