Astanada «Ádilet» saiasi partiiasynyń quryltai sezi ótti, dep habarlaidy dalanews.kz.
Jiynǵa elimizdiń barlyq óńirinen myńǵa jýyq delegat pen partiia jaqtastary jinaldy. Quryltai barysynda jańa saiasi birlestikti qurý, onyń resmi ataýyn bekitý, jarǵysy men baǵdarlamasyn qabyldaý, sondai-aq basshylyq jáne baqylaý organdaryn sailaý máseleleri qaraldy.
Jańa partiia qurý týraly sheshim qabyldandy
Sez barysynda delegattar «Ádilet» partiiasyn qurý týraly sheshimdi qoldady. Tiisti sheshimge sezge qatysqan 931 delegat daýys berdi. Sonymen qatar partiianyń qazaq, orys jáne aǵylshyn tilderindegi resmi ataýy bekitildi. Barlyq rásimder «Saiasi partiialar týraly» Qazaqstan Respýblikasynyń zańy talaptaryna sáikes ótti.
Quryltaida partiianyń negizgi qujattary – Jarǵysy men baǵdarlamasy qabyldandy. Jiynnyń resmi bóligi bastalmas buryn qonaqtarǵa arnap shaǵyn kontserttik baǵdarlama uiymdastyrylyp, keiin delegattar jańa saiasi uiymnyń aldaǵy baǵyttaryn talqylady.
Partiia basshysy bolyp Aibek Dádebai sailandy
Sez delegattarynyń sheshimimen partiia tóraǵasy qyzmetine Dádebai Aibek Arqabaiuly sailandy. Buǵan deiin quryltai barysynda jańa saiasi birlestiktiń saiasi keńesiniń quramy tanystyrylǵan bolatyn. Tizimge 30 adam endi.
Sez barysynda qatysýshylar Aibek Dádebaidy partiia tóraǵalyǵyna usyný týraly usynysty qoldady. Óz kezeginde Dádebai delegattarǵa senim bildirgeni úshin alǵys aityp, bul sheshimdi úlken jaýapkershilik dep qabyldaitynyn jetkizdi.
«Bizdiń niettesterimiz – dál osyndai azamattar. Olar – belsendi, jaýapkershiligi joǵary, el damýyna úles qosatyn jandar. Biz birge eńbek etemiz, jumysty ashyq, adal ári qoǵam aldynda esep bere otyryp júrgizemiz. Júieli, jaýapty jáne dáiekti jumys júrgizýge ýáde beremiz», – dep atap ótti Aibek Dádebai.
Jarǵy – partiianyń jumys tártibin aiqyndaityn negizgi qujat
Quryltaida partiia jarǵysynyń negizgi qaǵidattary da tanystyryldy. Saiasattanýshy Bórihan Nurmuhamedovtiń aitýynsha, bul qujat jai ǵana ishki ereje emes, partiianyń bolashaqtaǵy jumys baǵytyn aiqyndaityn mańyzdy negiz.
«Bul – úlken jaýapkershilik sáti. Bizdiń partiianyń erteń qandai bolatyny dál osy kezeńge bailanysty. Usynylǵan qujat – aýqymdy, tereń ári muqiiat júrgizilgen jumystyń nátijesi. Ol Qazaqstan Respýblikasynyń Konstitýtsiiasy men qoldanystaǵy zańnamasyna tolyq sáikes keledi. Biraq onyń mańyzy budan da keń. Bul – partiianyń saiasi júieniń tolyqqandy qatysýshysyna ainalýyna, azamattardyń múddesin qorǵaýyna jáne memlekettik saiasattyń qalyptasýyna yqpal etýine múmkindik beretin jumys quraly», – dedi ol.
Onyń sózinshe, jarǵynyń negizinde ashyqtyq, jaýapkershilik jáne azamattardyń qatysýy qaǵidattary jatyr. Partiia sezi uiymnyń eń joǵary organy retinde belgilenip, saiasi keńes pen biýro úzdiksiz jumysty qamtamasyz etetin qurylymdar retinde qarastyryldy.
Adami kapital men ádilet qaǵidaty: Baǵdarlamada ne aityldy?
Quryltai sezinde «Ádilet» partiiasynyń resmi baǵdarlamasy da bekitildi. Qujatta adami kapitaldy damytý, zań ústemdigin kúsheitý, óńirlerdiń teńgerimdi damýy jáne ádiletti qoǵam qurý máseleleri negizgi basymdyq retinde aiqyndalǵan.
Partiia ustanymynda ádildik, otanshyldyq, jaýapkershilik, eńbekqorlyq pen damý basty qundylyq retinde kórsetilgen. Baǵdarlamada densaýlyq saqtaý, bilim berý, ǵylym, mádeniet jáne kreativti indýstriialardy damytý arqyly qoǵam sapasyn arttyrýǵa erekshe mán berilgen.
Saiasattanýshy Marat Shibutov quryltai barysynda partiianyń baǵdarlamalyq ustanymdaryna toqtalyp, uiym óz jumysyn ádildik, jaýapkershilik, naqty áreket pen institýtsionaldyq qaǵidattarǵa negizdeitinin aitty. Onyń sózinshe, «Ádilet» partiiasy ádildik ideologiiasyna jáne jańa Konstitýtsiia qundylyqtaryna súienedi.
«Eń aldymen, baǵdarlamamyzdyń ereksheligine toqtalǵan jón. «Ádilet» partiiasy óziniń ádildik ideologiiasyna jáne jańa Konstitýtsiia qundylyqtaryna súienetinin airyqsha atap ótedi. Osy arqyly naqty mindettemelerdi óz moinyna alady. Bul degenimiz – baǵdarlama bolashaqtyń negizine ainalýy tiis qaǵidattarǵa qurylyp otyr degen sóz. Partiianyń negizgi tirekteri retinde ádildik, otanshyldyq, eńbekqorlyq, jaýapkershilik pen progress aiqyndalǵan», - dep atap ótti saiasattanýshy.
Partiianyń saiasi baǵyty
Partiia tóraǵasy Aibek Dádebai sezde málimdeme jasap, jańa saiasi birlestiktiń ideologiialyq negizderi men basty baǵyttaryn tanystyrdy. Onyń aitýynsha, partiia qyzmeti zańdylyq, tártip jáne qoǵamdyq jaýapkershilik qaǵidattaryna súienedi.
«Bizdiń partiiamyzdyń negizi zań ústemdigi men tártip qaǵidattaryna qurylady. Halyqtyń zań ústemdigine degen senimi – memlekettiń basty resýrsy ári tiregi. Sondyqtan bizdiń negizgi mindetimiz – ádildikti jariialaý ǵana emes, ony ortaq mádenietimizdiń ajyramas bóligine ári kúndelikti ómirimizdiń shartyna ainaldyrý. Basqasha aitqanda, Ádildik ulttyq sana men bolmystyń airyqsha sipatyna ainalýǵa tiis. Memleket basshysy Qasym-Jomart Toqaev óz nazaryn únemi dál osy baǵytqa aýdaryp keledi», – dedi Aibek Dádebai.
Ol partiianyń negizgi mindetteriniń biri memleket pen azamattar arasyndaǵy senimdi nyǵaitý, dialog pen jaýapkershilikke negizdelgen saiasi mádeniet qalyptastyrý ekenin atap ótti.
«Ádilet» Prezidenttiń reformalaryn qoldaidy
Jańa saiasi uiym Memleket basshysynyń reformalaryn qoldaitynyn da jariia etti. Partiia óz jumysyn zań ústemdigi men qoǵamdyq tártipke, tiimdi memlekettik institýttardy qalyptastyrýǵa, óńirlerdiń áleýetin kúsheitýge jáne «Halyq únine qulaq asatyn memleket» qaǵidatyn is júzinde júzege asyrýǵa negizdemek.
Sonymen qatar uiym ádiletti ári básekege qabiletti ekonomikany damytýǵa, áleýmettik yntymaq pen naqty qoldaýdy kúsheitýge, adami kapitaldy arttyrýǵa, tsifrlyq memleketti jetildirýge, «Taza Qazaqstan» bastamasyn qoldaýǵa, jaýapty orta derjava qaǵidatyn ustanýǵa jáne jańa geosaiasi etikany qalyptastyrýǵa basymdyq beredi.
Partiia ideologiiasynyń ózeginde Qazaqstannyń bolashaǵy ár azamattyń búgingi áreketine bailanysty degen ustanym jatyr. Bul – adal eńbek etý, zańdy qurmetteý jáne qoǵam ómirine beijai qaramai, el isine belsendi aralasý degendi bildiredi.
«Qarsylastyq emes, óz qundylyqtarymyz mańyzdy»
«Astana» halyqaralyq qarjy ortalyǵynyń basqarýshysy, partiianyń jetekshi tobynyń múshesi Renat Bekturov jańa saiasi uiymnyń qundylyqtary men jumys tásilderine toqtaldy. Onyń aitýynsha, «Ádilet» partiiasy ózin saiasi teketirestiń quraly retinde qarastyrmaidy jáne basty nazardy óz baǵdarlamalyq maqsattary men ideologiiasyna aýdarmaq.
Onyń sózinshe, partiianyń ereksheligi onyń bastamashylary men qoldaýshylarynyń býynymen de bailanysty. Bekturov partiia músheleriniń kópshiliginiń dúnietanymy Táýelsiz Qazaqstan kezeńinde qalyptasqanyn atap ótti.
Raýan Kenjehanuly: «partiia qoǵamdaǵy ózgeriske degen suranysqa jaýap berip»
Quryltai sezinde sóz sóilegen «Qazaq tili» halyqaralyq qoǵamynyń prezidenti, bastamashyl toptyń múshesi Raýan Kenjehanuly «Ádilet» partiiasy ádilet qaǵidatyn basty qundylyq retinde ustanatynyn aitty. Onyń sózinshe, partiia qoǵamdaǵy ózgeriske degen suranysqa jaýap berip, ár azamat óz ómirinde ádilettilikti sezinetin orta qalyptastyrýdy maqsat etedi.
Ol partiia óz qyzmetin ózge saiasi kúshtermen qarsylastyqqa qurmaitynyn aityp, basty nazar qoǵamdyq dialog pen memleket pen azamattar arasyndaǵy senimdi kúsheitýge aýdarylatynyn jetkizdi.
«Ádilettiń» negizgi tiregi jastar bolmaq
Partiia bastamashylarynyń biri Talant Omarbekov «Ádilet» partiiasyn qurýǵa 700 adam bastamashy bolǵanyn aitty. Onyń sózinshe, uiym qurylǵannan keiin partiianyń baǵdarlamasy men jarǵysy ázirlenip, múshelikke onlain tirkelýge múmkindik beretin arnaiy tsifrlyq platforma iske qosylǵan.
Sondai-aq qysqa ýaqyt ishinde partiiaǵa 9 myńnan astam adamnyń tirkelgeni aityldy. Bastamashyl top ókiliniń pikirinshe, partiiaǵa qyzyǵýshylyq tanytyp otyrǵandardyń basym bóligi – jastar.
«Jastarǵa áleýmettik lift pen jańa ózgerister qajet. Qazir saiasatqa aralasatyn ýaqyt kelgenin jastardyń ózi de túsinip otyr», – dedi ol.
