Túrkiianyń astanasy Ankara qalasynda túrik aeroǵarysh kompaniiasy TUSAŞ zaýytynyń ornynda terakt boldy. Bul aqparatty X jelisindegi paraqshasynda eldiń ishki ister ministri Ali Erlikaia rastady, - dep habarlaidy Dalanews.kz.
Oqiǵa saldarynan qaza tapqandar men jaralanǵandar bar ekeni belgili boldy.
"Qaitys bolǵandardyń jaqyndaryna kóńil aitamyn jáne jaralanǵandardyń tezirek saýyǵyp ketýin tileimin. Oqiǵa týraly aldaǵy ýaqytta habar beremiz. Málimdemeni resmi derekkózderden qadaǵalaýǵa keńes beremiz", - dep jazdy Ali Erlikaia.
Túrkiialyq BAQ málimetinshe, kýágerler aldymen kásiporyn qaqpasynda jarylys daýysyn estigen, sodan keiin atys bastalǵan. Kem degende eki adam qaitys boldy degen aqparat bar.
Qaiǵyly oqiǵadan keiin Memleket basshysy Qasym-Jomart Toqaev Ankara qalasynyń mańyndaǵy TUSAŞ aeroǵarysh korporatsiiasynyń ǵimaratyna jasalǵan lańkestik shabýyl saldarynan birneshe adamnyń qaza tabýyna bailanysty Túrkiia Prezidenti Rejep Taiyp Erdoǵanǵa kóńil aitty.
"Sýyt habardy tereń kúizelispen qabyldadym. Qazaqstan beibit turǵyndarǵa qarsy qastandyq áreketti qatań aiyptaidy. Osyndai aýyr sátte Sizge jáne barsha túrik halqyna, sondai-aq qaitys bolǵan azamattardyń jaqyn týystaryna qaiǵyryp kóńil aitamyn. Marqumdardyń jany jannatta bolsyn. Zardap shekkenderdiń tezirek saýyǵyp ketýine tilektestik bildiremin", – dep jazylǵan jedelhatta.
