Basketboldan qyzdar arasynda Túrkistandaǵy «Olympic Center» sport kesheninde Qazaqstan Respýblıkasynyń HHH chempıonatynyń sheshýshi kezeńi ótti. Atalǵan synǵa elimizdiń iriktelip shyqqan eń úzdik 4 komandasy qatysty. Túrkistan oblysynyń namysyn qorǵaıtyn «Turan» komandasy keremet sheberligin kórsetip, Qazaqstan chempıony atandy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Túrkistandyq arýlar bas júlde úshin bolǵan tartysta Aqmola oblysynyń «Oqjetpes» komandasymen 4 ret kezdesip, 3:1 esebimen jeńdi. Sheshýshi synda alań ıeleri aqmolalyq qarsylasynan 54:49 esebimen basym tústi. Qos myqtynyń tartysqa toly básekesin mamandar joǵary baǵalady.

Chempıon atanǵan «Turan» komandasy men kúmis júldege ıe bolǵan «Oqjetpes» komandasyn jáne úzdik oıynshylardy Túrkistan oblysy ákiminiń orynbasary Sáken Qalqamanov pen sport salasynyń basshylary arnaıy marapattady. Jyldyń úzdik oıynshysy (MVP) bolyp túrkistandyq Zalına Kýrazova tanyldy. Oǵan arnaı yqurmet kórsetildi.

Túrkistan oblysynyń ákimi Ómirzaq Shókeevtiń tikeleı qoldaýymen qurylǵan «Turan» sporttyq oıyn túrleri klýby qysqa ýaqytta aıtýly jeńisterge qol jetkizip úlgerdi. Qyzdar el chempıonatynda altyn júldege ıe boldy. 2021 jyly «Turan» jastar quramasynyń erler komandasy Qazaqstan Respýblıkasynyń kúzgi chempıonatynda top jarsa, «Turan» áıelder komandasy kýboktyń jeńimpazy atanǵan bolatyn.