Kún saıyn 200-300-ge tarta qaýyn-qarbyz tıelgen júk kólikteri TMD, Baltyq jaǵalaýy elderine, Túrkıa, Germanıa, Grekıa elderine jol tartyp jatyr.
Aýdan ákimi Baqyt Asanov baqshany aýdanda eń kóp egetin A.Qalybekov aýyldyq okrýginde bolyp, dıqandardyń jaǵdaıymen jáne qaýyn-qarbyz eksportynyń jumys barysymen tanysty.
Bıyl Maqtaaral dıqandary 14607 gektar jerge baqsha daqylyn ekken. Onyń ishinde 3332 gektar jerge plenkaly qaýyn, 362 gektar jerge plenkaly qarbyz, 10643 gektar jerge ashyq qaýyn jáne 270 gektar jerge ashyq qarbyz egilgen.
Qazirgi tańda baqshadan jalpy kólemi 200 myń tonnaǵa jýyq qaýyn-qarbyz ónimi óndirilip, onyń 80%-y shet memleketterge eksporttaldy.
"Jıenbet", "Valet" sıaqty sorttary tasymaldaýǵa yńǵaıly. Dámi til úıiretin jańa sorttardyń arqasynda sońǵy jyldary maqtaaraldyq dıqandar úlken tabys taýyp, Reseı men Eýropanyń naryǵyna erkin enip otyr.
Sondaı-aq básekelestik ortada jerlesterimiz Ózbekstan men Túrkimenstan elderine de des bermeı keledi.
Qazirgi tańda Maqtaaral aýdanynyń kireberisindegi logıstıkalyq ortalyq júk kólikterine lyq tolǵan. Eýropadan jáne basqa da elderden kelgen kásipkerler úshin ortalyqta barlyq jaǵdaı jasalǵan.
Atap aıtqanda, qonaq úı, kafe, avtoturaq, baseın kesheni, qosalqy bólshek dúkeni jáne kókónis saqtaý qoımasynyń qyzmetteri qarastyrylǵan.
