Májiliste qala basshysy Á.Óserbaev pen oblystyq aqsaqaldar alqasynyń tóraǵasy J.Áziretbergenuly rýhani shahar, jańa oblystyń ortalyǵy Túrkistan qalasynyń kelbeti men ajaryna turǵyndardy bir kisidei atsalysýǵa shaqyryp, ortaq múdde – qaladaǵy qoǵamdyq tártipti jandandyrý, meiramhanalar men toihanalardyń jumysyn birlesken túrde júieleý barysy keńinen talqylandy.
Bul basqosýda oblystyq aqsaqaldar alqasynyń tóraǵasy tarapynan «Túrkistannyń júiesi» atty pilottyq joba usynyldy. Ol jobada qalanyń qoǵamdyq tártibi men tazalyǵy, jastar arasyndaǵy adamgershilik qaǵidattarynyń ustanymy, jiyn-toi ótkizý dástúrine keiingi ýaqytta engen daqpyrtpen astamshylyqqa toqtaý qoiý, asabalardyń toi júrgizý mádenieti aityla kelip, barlyq baǵytta tártipti júieleý úshin qoǵamdyq negizde kóshe komitetterin qurý týraly joba usynyldy.
– Búgingi kezdesýdiń taqyrybynyń ózi «Rýhani jańǵyrý Túrkistan tórinen bastalǵandai...» dep úlken mańyzdylyǵyn kórsetip otyr. Sebebi tarihi Túrkistannyń statýsy biylǵy jyly eselene tústi. Jańa oblystyń ortalyǵy boldy. Buǵan deiinde óziniń tarihi qundylyǵyna orai rýhani Astana, Túrki jurtynyń mádeni astanasy atalyp keldi. Sońǵy 3-4 aidyń kóleminde qalamyzda birqatar ózgerister men jaǵymdy jańalyqtar oryn aldy. Oblystyq ákimshilik, basqaramalar men departamentter kelip qonystandy. Úkimet basshylary men shet eldik investorlar kelip, Túrkistanǵa degen qyzyǵýshylyǵy men yqylasyn tanytýdy. Al eń úlkeni Elbasymyz Nursultan Nazarbaevtyń ózi jýyrda kelip, Túrkistannyń keleshek kelbeti men bolashaq baǵdaryn aiqyndap berdi. Alda júzege asyratyn qanshama josparlar men jobalar, úlken úlken maqsattar aiqyndaldy. Endigi bizdiń mindetimiz Elbasy aiqyndap bergen osy mindetterdi mejelengen ýaqytta júzege asyrý. Osy tusta Túrkistan qalasynyń turǵyndaryna halqyna júkteletin eń úlken mindet qalanyń rýhani atyna laiyqty mádeniet qalyptastyryp, kelisti kelbetin jasaý. Birinshi kezekte árkim mádeniet pen rýhani jańǵyrýdy ózinen bastaý degen másele tur. Qala kelbeti tek sándi úilermen, sáýletti ǵimarattarmen, jasyl jelekpen ǵana ólshenbeidi. Kún saiyn kórkeiip kele jatqan Túrkistannyń ajary eń birinshi tazalyǵyna bailanysty. Qalanyń tazalyǵy aýladan, ár otbasynan bastalady, – dedi qala basshysy.
Á.Óserbaev qalanyń tazalyǵy basqaǵa emes, eń birinshi kezekte qala turǵyndaryna qajet ekenin alǵa tartty. «Sondyqtan da osynda otyrǵan barshańyz Túrkistannyń bolashaǵyna jaýaptymyz degen pikirde bolýymyz kerek. Túrkistan úshin jan aýyrtyp, bas qatyryp tirlik jasaityn, oblystyń ortalyǵy bolǵan ortalyq qalanyń turǵyny ekenińizdi sezinetin ýaqyt jetti» dep jurtty Túrkistannyń rýhani kelbetin qalyptastyrýǵa shaqyrdy.
