Túrkistanǵa investitsiia tartylyp, halyqtyń ál-aýqaty kóteriledi
Kezdesýdi QR Prezidenti janyndaǵy Qazaqstan strategiialyq zertteýler institýty men Túrkistan oblysy ákimdiginiń ishki saiasat basqarmasy birlesip ótkizdi.
Jiynda atalǵan institýttyń áleýmettik-saiasi zertteýler bóliminiń basshysy Alýa Joldybalina «Ómir sapasynyń deńgeii: negizgi ólshemderi men indikatorlary» taqyrybynda baiandama jasady.
– Túrkistan oblysynyń jańadan qurylýynyń ózi bul óńirdiń áleýeti myqty ekenin bildiredi. Sebebi eńbek kúshi bar ári birqatar salalardy damytýǵa qolaily oblys. Osy bastama arqyly Túrkistanǵa investitsiia tartylyp, halyqtyń ál-aýqaty kóteriledi. Elbasy Joldaýyndaǵy basty mindet te – osy. Iaǵni eldiń turmys deńgeiin kóterý, – degen ol ómir sapasyn anyqtaýdaǵy negizgi indikatorlar men ólshemder týraly túsindirip berdi.
QR Prezidenti janyndaǵy Qazaqstan strategiialyq zertteýler institýtynyń aqparattyq-taldaý jumysy bóliminiń basshysy Ásel Nazarbetova «Jańa zamannyń memlekettik qyzmetkerleri – el saiasatynyń tiimdi júzege asýynyń negizi» taqyrybynda oi qozǵady. Spiker memlekettik qyzmetkerler qoǵammen dialog ornatýǵa daiyn bolyp, otanshyl ári joǵary mádenietimen daralanyp, komanda quramynda jumys istei bilýi kerek ekenin aitty.
– Elbasy memlekettik qyzmetshilerdiń deńgeiin, memlekettik organdardyń tiimdiligin arttyrý jóninde tapsyrma berdi. Bul baǵytta da jańa bastamalar qolǵa alynyp jatyr. Máselen, eski júie boiynsha memlekettik qyzmetkerdiń jalaqysy onyń laýazymy men eńbek ótiline bailanysty bolatyn. Al jańa júie boiynsha jumystyń kúrdeliligi eskeriledi. Jumysty sapaly istegen qyzmetkerlerge bonýstar beriledi. Osy arqyly basshylyq pen mamandar jalaqysy arasyndaǵy alshaqtyq tómendeidi, – dedi ol.
Sonymen qatar belgili saiasattanýshy Bórihan Nurmuhammed biyl bir jylda eki Joldaýdyń jariialanýynyń astarynda Elbasynyń áleýmettik máselelerdi jyldam sheshý maqsaty jatqanyn aitty. Sebebi úsh ai buryn aitylǵan tapsyrmalar men bastamalardy kelesi jyldyń biýdjetine engizýge múmkindik bar. «Osy arqyly qoǵamdaǵy eń ózekti máseleler sheshimin tabady. Al Túrkistanǵa kelsek, bul qaladaǵy jetekshi oqý oryndary memlekettik basqarý, ýrbanizatsiia, týrizm salalary boiynsha myqty mamandar daiarlaýdy kúsheitýleri tiis» dedi.
Jiyndy júrgizip otyrǵan oblystyq ishki saiasat basqarmasynyń basshysy Beisenbai Tájibaev Astanadan kelgen sarapshylardyń pikirleri stýdentter men oqytýshylarǵa serpin beretinin jetkizse, Q.A.Iasaýi atyndaǵy HQTÝ-dyń áleýmettaný ǵylymdarynyń doktory Orazbek Nusqabaev jańa bastamalardy júzege asyrýǵa ǵalym-ustazdar da úles qosýǵa daiyn ekenin málimdedi.
Kezdesý sońynda QR Prezidenti janyndaǵy Qazaqstan strategiialyq zertteýler institýtynyń áleýmettik-saiasi zertteýler bóliminiń basshysy Alýa Joldybalina jiynǵa qatysýshylarǵa qoǵamdaǵy ózekti máselelerge jedel monitoring jasaý jóninde seminar-trening ótkizdi.
