كەزدەسۋدى ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى مەن تۇركىستان وبلىسى اكىمدىگىنىڭ ىشكى ساياسات باسقارماسى بىرلەسىپ وتكىزدى.
جيىندا اتالعان ينستيتۋتتىڭ الەۋمەتتىك-ساياسي زەرتتەۋلەر ءبولىمىنىڭ باسشىسى الۋا جولدىبالينا «ءومىر ساپاسىنىڭ دەڭگەيى: نەگىزگى ولشەمدەرى مەن ينديكاتورلارى» تاقىرىبىندا بايانداما جاسادى.
– تۇركىستان وبلىسىنىڭ جاڭادان قۇرىلۋىنىڭ ءوزى بۇل ءوڭىردىڭ الەۋەتى مىقتى ەكەنىن بىلدىرەدى. سەبەبى ەڭبەك كۇشى بار ءارى ءبىرقاتار سالالاردى دامىتۋعا قولايلى وبلىس. وسى باستاما ارقىلى تۇركىستانعا ينۆەستيسيا تارتىلىپ، حالىقتىڭ ءال-اۋقاتى كوتەرىلەدى. ەلباسى جولداۋىنداعى باستى مىندەت تە – وسى. ياعني ەلدىڭ تۇرمىس دەڭگەيىن كوتەرۋ، – دەگەن ول ءومىر ساپاسىن انىقتاۋداعى نەگىزگى ينديكاتورلار مەن ولشەمدەر تۋرالى ءتۇسىندىرىپ بەردى.
ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ اقپاراتتىق-تالداۋ جۇمىسى ءبولىمىنىڭ باسشىسى اسەل نازاربەتوۆا «جاڭا زاماننىڭ مەملەكەتتىك قىزمەتكەرلەرى – ەل ساياساتىنىڭ ءتيىمدى جۇزەگە اسۋىنىڭ نەگىزى» تاقىرىبىندا وي قوزعادى. سپيكەر مەملەكەتتىك قىزمەتكەرلەر قوعاممەن ديالوگ ورناتۋعا دايىن بولىپ، وتانشىل ءارى جوعارى مادەنيەتىمەن دارالانىپ، كوماندا قۇرامىندا جۇمىس ىستەي ءبىلۋى كەرەك ەكەنىن ايتتى.
– ەلباسى مەملەكەتتىك قىزمەتشىلەردىڭ دەڭگەيىن، مەملەكەتتىك ورگانداردىڭ تيىمدىلىگىن ارتتىرۋ جونىندە تاپسىرما بەردى. بۇل باعىتتا دا جاڭا باستامالار قولعا الىنىپ جاتىر. ماسەلەن، ەسكى جۇيە بويىنشا مەملەكەتتىك قىزمەتكەردىڭ جالاقىسى ونىڭ لاۋازىمى مەن ەڭبەك وتىلىنە بايلانىستى بولاتىن. ال جاڭا جۇيە بويىنشا جۇمىستىڭ كۇردەلىلىگى ەسكەرىلەدى. جۇمىستى ساپالى ىستەگەن قىزمەتكەرلەرگە بونۋستار بەرىلەدى. وسى ارقىلى باسشىلىق پەن ماماندار جالاقىسى اراسىنداعى الشاقتىق تومەندەيدى، – دەدى ول.
سونىمەن قاتار بەلگىلى ساياساتتانۋشى ءبورىحان نۇرمۇحاممەد بيىل ءبىر جىلدا ەكى جولداۋدىڭ جاريالانۋىنىڭ استارىندا ەلباسىنىڭ الەۋمەتتىك ماسەلەلەردى جىلدام شەشۋ ماقساتى جاتقانىن ايتتى. سەبەبى ءۇش اي بۇرىن ايتىلعان تاپسىرمالار مەن باستامالاردى كەلەسى جىلدىڭ بيۋدجەتىنە ەنگىزۋگە مۇمكىندىك بار. «وسى ارقىلى قوعامداعى ەڭ وزەكتى ماسەلەلەر شەشىمىن تابادى. ال تۇركىستانعا كەلسەك، بۇل قالاداعى جەتەكشى وقۋ ورىندارى مەملەكەتتىك باسقارۋ، ۋربانيزاسيا، تۋريزم سالالارى بويىنشا مىقتى ماماندار دايارلاۋدى كۇشەيتۋلەرى ءتيىس» دەدى.
جيىندى جۇرگىزىپ وتىرعان وبلىستىق ىشكى ساياسات باسقارماسىنىڭ باسشىسى بەيسەنباي تاجىبايەۆ استانادان كەلگەن ساراپشىلاردىڭ پىكىرلەرى ستۋدەنتتەر مەن وقىتۋشىلارعا سەرپىن بەرەتىنىن جەتكىزسە، ق.ا.ياساۋي اتىنداعى حقتۋ-دىڭ الەۋمەتتانۋ عىلىمدارىنىڭ دوكتورى ورازبەك نۇسقابايەۆ جاڭا باستامالاردى جۇزەگە اسىرۋعا عالىم-ۇستازدار دا ۇلەس قوسۋعا دايىن ەكەنىن مالىمدەدى.
كەزدەسۋ سوڭىندا ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ الەۋمەتتىك-ساياسي زەرتتەۋلەر ءبولىمىنىڭ باسشىسى الۋا جولدىبالينا جيىنعا قاتىسۋشىلارعا قوعامداعى وزەكتى ماسەلەلەرگە جەدەل مونيتورينگ جاساۋ جونىندە سەمينار-ترەنينگ وتكىزدى.
