Senat tóraǵasy qyzmetinen ketken Máýlen Áshimbaev jańa halyqaralyq mindet atqaratynyn málimdedi. Ol 2027 jylǵy Sheih Zaid atyndaǵy "Adamzat baýyrlastyǵy úshin" halyqaralyq syilyǵynyń qazylar alqasynyń quramyna engen, dep habarlaidy dalanews.kz.
Áshimbaevtyń aitýynsha, ony qazylar alqasyna qosylýǵa ál-Azhardyń Bas imamy Ahmed at-Taieb shaqyrǵan.
"Búginde halyqaralyq kún tártibindegi ózekti máselelerdiń biri – beibitshilik pen kelisimdi saqtaý, sondai-aq túrli mádeniet, din jáne halyqtar arasyndaǵy dialogty damytý", – dep jazdy ol.
Ol Qazaqstan táýelsizdiktiń alǵashqy kúnderinen bastap osy baǵytta belsendi jumys istep kele jatqanyn atap ótti.
Áshimbaev sondai-aq Adamzat baýyrlastyǵy ideiasynyń 2019 jyly Abý-Dabide Rim Papasy Frantsisk pen ál-Azhardyń Bas imamy Ahmed at-Taiebtiń bastamasymen kóterilgenin eske saldy. Keiin bul bastama halyqaralyq deńgeidegi qozǵalysqa ainalǵan.
Sheih Zaid atyndaǵy «Adamzat baýyrlastyǵy úshin» syilyǵy beibitshilik, dialog jáne ózara túsinistikti nyǵaitýǵa úles qosqan tulǵalar men uiymdarǵa beriledi.
2027 jylǵy qazylar alqasynyń quramynda Máýlen Áshimbaevpen birge Portýgaliianyń burynǵy prezidenti Marselý Rebelý de Soýza jáne Iraktyń eks-prezidenti Barham Saleh te bar.
