Qazirgi tańda Túrkistanda mádeniet pen ónerge airyqsha kóńil bólinip keledi. Rýhaniiatty damytýǵa arnalǵan tyń jobalar iske asýda. Respýblikalyq, halyqaralyq deńgeidegi simpoziýmdar, óner festivaldary ótip keledi. Sonyń biri Respýblika kúnine orai uiymdastyrylǵan halyqaralyq «Voice of Turan-2024» qazaq ánderin oryndaýshylar baiqaýy. Keshe oblys ákiminiń birinshi orynbasary Zulpyhar Joldasov festival qonaqtarymen kezdesip, Indoneziianyń Qazaqstandaǵy Tótenshe jáne ókiletti elshisi Mohamad Fadjrýl Rahmandy arnaiy qabyldady. Eki el arasyndaǵy týristik bailanystardy nyǵaitýǵa ýaǵdalasty, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Turan daýysyn tamashalaýǵa kelgen Indoneziianyń Qazaqstandaǵy Tótenshe jáne ókiletti elshisi Mohamad Fadjrýl Rahman óz kezeginde jańarǵan Túrkistan qalasy týraly áserin jetkizdi. Indoneziia eli jaily jan-jaqty maǵlumat berdi. Atalǵan memleketten qatysyp jatqan indoneziialyq ánshi Tarraringe sáttilik tiledi. Eki el arasyndaǵy bailanystyń nyshany retinde estelikke syi-siiapat tabystaldy.
Túrkistannyń tereń tarihyna jáne jańa kelbetine qyzyǵýshylyq tanytyp keletin týrister sany kún sanap artyp otyr. Olarǵa laiyqty qyzmet sapasyn arttyrý, tarihi oryndarmen qatar, jańadan boi kótergen mádeni nysandardy rýhani baǵyttaǵy sharalarǵa degen qoljetimdilikterin arttyrý maqsatynda óńirde júieli jumystar qolǵa alynǵan.
Aita keteiik, qazaq ánderin álemdik deńgeide nasihattaýdy maqsat etken baiqaýdyń jyl saiyn aýqymy ulǵaiyp keledi. 2 ret onlain rejimde uiymdastyrylǵan festival 5 jyldan beri halyqtyq merekege ainalyp úlgerdi. Biylǵy baiqaýǵa 16 elden kelgen qatysýshylar «Kongress Holl» kesheninde eki kún boiy óz baqtaryn synamaq.
