Túrkistandyq ustazdar oqýshylardy liderlikke tárbieleýdi úirenýde
«Jas Leader Akademiiasy» baǵdarlamasy Túrkistan qalasynda bastaý aldy. Baǵdarlamanyń maqsaty – qazaq mektepteriniń 5-11 synyp oqýshylary arasynda kóshbasshylyq qabiletterdi qoldaý jáne damytý. Balalarǵa qarym-qatynas daǵdylary úiretiledi – bul kópshilik aldynda sóileý, ýaqytty josparlaý jáne basqarý, ózin-ózi tanystyrý jáne ózine degen senimdilikti damytady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Oqýshylarǵa qarym-qatynas, syni oilaý negizderin, kópshilik aldynda sóileý jáne kelissóz júrgizý daǵdylaryn tiimdi paidalaný úiretiledi. Fakýltativ sabaqtar, ai saiynǵy kezdesýler, sheberlik synyptar, tanymal tulǵalardyń qatysýymen kóshbasshylyq treningter jáne úzdik oqýshylar marapattalatyn jyl saiynǵy konferentsiialar josparlanǵan.
– Bolat Ótemuratov qory men Túrkistan oblysy ákimdigi arasynda memorandým túzilgen. Bul joba sonyń aiasynda júzege asyp otyr. Erekshe joba 5 jylǵa jalǵasady. Iaǵni, qazir oqytylǵan 100 muǵalim bir jyldyń kóleminde úirengen ádis-tásilderin mektepterinde ótetin fakýltativ sabaqtarynda paidalanyp, ózderiniń esepterin beretin bolady. Joba mamandary treningke qatysqan muǵalimderdiń mektepterine baryp, synyp jaǵdaiynda baǵalaý jumystaryn júrgizedi. Al, jyl sońynda jiyn ótkizilip, dáres alǵan ustazdardyń úzdikterin marapattap, jattyqtyrýshy atanady. Osylaisha 5 jylda jattyqtyrýshylardyń sandaryn arttyrýdy kózdep otyrmyz, – dedi Túrkistan oblysy Adami áleýetti damytý basqarmasynyń basshysy Rahymbek Jolaev.
Baǵdarlama aiasynda bir ai ishinde Túrkistan men Túrkistan oblysynyń jáne Shymkent qalasynyń 50 pilottyq mektebinen 100 muǵalim treningke qatysady. Baǵdarlamany birinshi bolyp 15 000-nan astam bala oqýdy bastaidy. Aldaǵy bes jylda Jambyl, Qyzylorda, Atyraý, Mańǵystaý, Batys Qazaqstan, Aqtóbe jáne Almaty oblystary qamtylmaq. Baǵdarlamanyń jalpy biýdjeti 5 mln AQSh dollaryn quraidy.
«Baǵdarlamada ustaz róli erekshe kórsetilgen. Bizdiń baǵdarlamada jattyqtyrýshy qatysýshylarǵa basymdyq bermeidi, olarmen bir deńgeide ornalasady. Ol «joǵary turǵan – tómen turǵan» pozitsiiadan emes, «teńge teń» pozitsiiasy boiynsha áreket etip, olarǵa material alýǵa, bilim men tájiribe jinaýǵa kómektesedi», – deidi Bolat Ótemuratov Qorynyń direktory Marat Aitmaǵambetov.
