وقۋشىلارعا قارىم-قاتىناس، سىني ويلاۋ نەگىزدەرىن، كوپشىلىك الدىندا سويلەۋ جانە كەلىسسوز جۇرگىزۋ داعدىلارىن ءتيىمدى پايدالانۋ ۇيرەتىلەدى. فاكۋلتاتيۆ ساباقتار، اي سايىنعى كەزدەسۋلەر، شەبەرلىك سىنىپتار، تانىمال تۇلعالاردىڭ قاتىسۋىمەن كوشباسشىلىق ترەنينگتەر جانە ۇزدىك وقۋشىلار ماراپاتتالاتىن جىل سايىنعى كونفەرەنسيالار جوسپارلانعان.
– بولات وتەمۇراتوۆ قورى مەن تۇركىستان وبلىسى اكىمدىگى اراسىندا مەموراندۋم تۇزىلگەن. بۇل جوبا سونىڭ اياسىندا جۇزەگە اسىپ وتىر. ەرەكشە جوبا 5 جىلعا جالعاسادى. ياعني، ءقازىر وقىتىلعان 100 ءمۇعالىم ءبىر جىلدىڭ كولەمىندە ۇيرەنگەن ادىس-تاسىلدەرىن مەكتەپتەرىندە وتەتىن فاكۋلتاتيۆ ساباقتارىندا پايدالانىپ، وزدەرىنىڭ ەسەپتەرىن بەرەتىن بولادى. جوبا ماماندارى ترەنينگكە قاتىسقان مۇعالىمدەردىڭ مەكتەپتەرىنە بارىپ، سىنىپ جاعدايىندا باعالاۋ جۇمىستارىن جۇرگىزەدى. ال، جىل سوڭىندا جيىن وتكىزىلىپ، دارەس العان ۇستازداردىڭ ۇزدىكتەرىن ماراپاتتاپ، جاتتىقتىرۋشى اتانادى. وسىلايشا 5 جىلدا جاتتىقتىرۋشىلاردىڭ ساندارىن ارتتىرۋدى كوزدەپ وتىرمىز، – دەدى تۇركىستان وبلىسى ادامي الەۋەتتى دامىتۋ باسقارماسىنىڭ باسشىسى راحىمبەك جولايەۆ.
باعدارلاما اياسىندا ءبىر اي ىشىندە تۇركىستان مەن تۇركىستان وبلىسىنىڭ جانە شىمكەنت قالاسىنىڭ 50 پيلوتتىق مەكتەبىنەن 100 ءمۇعالىم ترەنينگكە قاتىسادى. باعدارلامانى ءبىرىنشى بولىپ 15 000-نان استام بالا وقۋدى باستايدى. الداعى بەس جىلدا جامبىل، قىزىلوردا، اتىراۋ، ماڭعىستاۋ، باتىس قازاقستان، اقتوبە جانە الماتى وبلىستارى قامتىلماق. باعدارلامانىڭ جالپى بيۋدجەتى 5 ملن اقش دوللارىن قۇرايدى.
«باعدارلامادا ۇستاز ءرولى ەرەكشە كورسەتىلگەن. ءبىزدىڭ باعدارلامادا جاتتىقتىرۋشى قاتىسۋشىلارعا باسىمدىق بەرمەيدى، ولارمەن ءبىر دەڭگەيدە ورنالاسادى. ول «جوعارى تۇرعان – تومەن تۇرعان» پوزيسيادان ەمەس، «تەڭگە تەڭ» پوزيسياسى بويىنشا ارەكەت ەتىپ، ولارعا ماتەريال الۋعا، ءبىلىم مەن تاجىريبە جيناۋعا كومەكتەسەدى»، – دەيدى بولات وتەمۇراتوۆ قورىنىڭ ديرەكتورى مارات ايتماعامبەتوۆ.
