Búgin, 5 qazan “Ustazdar” kúninde QR Prezidenti Qasym-Jomart Toqaev, ustazdar qaýymyn kásibi merekesimen quttyqtap, asa jaýapty ári qasterli mindetti abyroimen atqaryp júrgen pedagogterge alǵys aitty, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Meniń tapsyrmammen «Pedagog mártebesi týraly» arnaiy zań qabyldandy. Bul qujat ustazdardyń zańdy múddesi men quqyqtaryn qorǵaýǵa yqpal etti. Qazir muǵalimder men tárbieshilerdiń jalaqysy aitarlyqtai kóbeidi. Olar negizgi qyzmetine kedergi keltiretin artyq mindetterden bosatyldy. Osy zańǵa sáikes «Qazaqstannyń eńbek sińirgen ustazy» ataǵy engizildi. Bul – jai ataq emes, mártebeli memlekettik nagrada. Onyń iegerine qomaqty syiaqy beriledi. Respýblika boiynsha 46 muǵalim osy nagradaǵa ie boldy. Sondai-aq qazir ustazdarǵa akademiialyq dárejesine sáikes ústemeaqy tólenip jatyr. Halyqaralyq olimpiada júldegerlerin daiyndaǵan muǵalimderge qarjylai qoldaý kórsetiledi. Pedagog mamandyǵy boiynsha oqyp jatqan stýdentterdiń shákirtaqysy 2,5 ese kóbeidi. Biyl bolashaq ustazdardy daiarlaý úshin 16 myńǵa jýyq grant bólindi. Sonyń ishinde shamamen 1800 «Altyn belgi» iegeri pedagogika mamandyǵyn tańdady. Bul – óte jaqsy úrdis, – dedi Memleket basshysy.
Memleket basshysy Aqorda tórinde elimizdegi úzdik ustazdardy qabyldap, memlekettik nagradalar tabystady. Olardyń qatarynda Túrkistan oblysy, Ordabasy aýdanynyń «Sh.Ýálihanov atyndaǵy mektep-gimnaziiasynyń» aǵylshyn tili pániniń muǵalimi, Abibýlla Jakýdaev ta bar. Pedagogika salasynda 40 jyldan astam eńbek etken ustazdyń oqýshylary halyqaralyq, respýblikalyq bilim shyńyn baǵyndyryp, búginde Túrkistan oblysyn kópke tanytyp keledi. Bilim salasyna ólsheýsiz úles qosqan aǵartýshy ustaz, bul kúni Memleket basshysynyń qolynan “Qazaqstannyń eńbek sińirgen ustazy” tósbelgisimen marapattaldy.
