Túrkistandyq sportshylar 13-19 tamyz kúnderi Qytaidyń Ýsi qalasynda taekvondodan jasóspirimder arasynda (WT) ótken «Grand slam-2024» halyqaralyq týrnirinen júldeli oraldy, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Alǵash ret uiymdastyrylǵan halyqaralyq saiysta Nálibai Janshýaq 2-orynǵa (45-61 keli salmaqta), Akramova Shahrizod 3-orynǵa (33-45 keli salmaqta) ie boldy. Jattyqtyrýshylary – Turarov Abzal men Turlybek Jandarbek.
«Sportqa kelgende taekvondony ózim tańdadym. 10 jasymnan bastap osy sport túrimen shuǵyldanyp kelemin. Ózime qatty unaidy. Bolashaqta olimpiada chempiony bolǵym keledi. Sol úshin de aianbai ter tógýge daiynmyn» – dedi túrkistandyq jas sportshy Janshýaq Nálibai.
Sondai-aq ol sporttaǵy ár jetistigine qoldaý bildiretin ata-anasy men jattyqtyrýshysyna alǵysyn jetkizdi.
Aita keteiik, atalǵan halyqaralyq sport saiysyna elimizden 34 sportshy qatysqan bolatyn. 20-dan asa memleket qatysqan týrnirde Qazaqstan quramasy komandalyq esepte 1-oryndy ielenip, 7 altyn, 3 kúmis, 6 qola medaldi qanjyǵaǵa bailady.
