Túrkistandyq oqýshy qymyz quiǵysh robot jasady
Túrkistan oblysy, Tólebi aýdanynyń brendi – qymyz. Osy ulttyq sýsynymyzdyń emdik qasietin nasihattai otyryp, robototehnikanyń múmkindikterin adam igiligine paidalaný maqsatynda Tólebi aýdanyndaǵy Sh.Ýálihanov atyndaǵy №2 jalpy orta mektebiniń 9-synyp oqýshysy Jansultan Tórebek ustazy, informatika pániniń muǵalimi Laýra Jaqsybekovanyń kómegimen «Asylbek» dep atalatyn qymyz quiǵysh robot jasady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Kez kelgen adam atalmysh robotqa arnaiy plastikalyq kartany jaqyndatý arqyly «Asylbekti» sóilete bastaidy. Sodan keiin robot qymyzdyń shipaly qasieti týraly qysqasha maǵlumat beredi. Osydan soń ǵana «Asylbek» ydysqa shóldi basatyn paidaly sýsyn quiady.
– Robottardyń túrlerine, jumys isteý printsipterine qyzyǵýshylyǵym burynnan bar bolatyn. Mundai robot qurastyrý ideiasy mektebimizde ótken informatika páni aptalyǵynda uiymdastyrylǵan robottar kórmesi kezinde týdy. «Asylbek» robotyn jasaý týraly oiymmen aldymen muǵalimim Laýra apaimen bólistim. Ol ideiamdy qoldap, qurastyrýda kómektesetinin aitty. Meniń robotym oqýshylardyń robototehnikaǵa degen qyzyǵýshylyǵyn arttyrýmen qatar, emdik qasietke ie sýsyn qymyz arqyly jastardyń arasynda salaýatty ómir saltyn dáripteidi. Ulttyq sýsynymyzdy nasihattaityn bolǵandyqtan, «Asylbektiń» ulttyq kiimde bolǵany durys dep sheshtik, – deidi Jansultan.
Onyń qymyz quiǵysh robot jobasy ǵylymi jobalar baiqaýynyń aýdandyq jáne oblystyq kezeńderinde júldeli boldy.
