Elbasynyń 2019 jyldy Jastar jyly dep jarıalaýyna oraı, Túrkistan oblystyq jastar resýrstyq ortalyǵynyń basshysy Bereke Dúısebekov arnaıy baspasóz konferensıasyn ótkizdi. Spıkerlerdiń qatarynda jas aqyn Muqaǵalı Kenjetaıuly men Iasaýı atyndaǵy HQTÝ-ń stýdenti Úmit Rahymjanqyzy da boldy.
Jastar jylyna qatysty túrkistandyq jastardyń bıylǵy jańalyǵy qandaı bolmaq degen taqyryp aıasynda sóz bastaǵan ortalyq basshysy taıaý kúnderi oblys ortalyǵy – Túrkistan shaharynda elimizde alǵash ret, basqa óńirlerde kezdespeıtin kóp fýnksıonaldy úlken jastar ortalyǵy ashylatynyn jetkizdi.
– Bul ortalyq neni qamtıdy? Búgingi Elbasymyz aıtqan tapsyrmalardy, onyń ishinde, jastardy bilimge, ǵylymǵa, ınovasıalyq jobalarǵa baǵyttaý, ıaǵnı olardy oqytyp, úıretý syndy qyzmetterdi óz mindetine alatyn bolady. Sonymen qatar, Memleket basshysy jıynda jastardyń mamandyq tańdaý máselelerin de aıtyp ótti. Ol boıynsha atalǵan ortalyqta jastardyń barlyǵyna zamanaýı úlgide jabdyqtalǵan, tegin vaı-faı, ǵalamtor syndy qajettiliktermen qamtamasyz etilgen «So-working» ortalyǵy, ıaǵnı arnaıy jumys alańy qyzmet etetin bolady. Bul degenimiz, kez kelgen jas azamat osy Túrkistan qalasynda óz isin ashyp, kásipker bolsa, ol bir jerden keńseni ashý úshin qanshama aqshaǵa keńse jaldap, shyǵyndalady. Al bizdiń oǵan memleket tarapynan kómegimiz tegin jumys ornyn beremiz. Iaǵnı, kásibiniń aıaqqa turyp, damyp ketýine atsalysatyn bolamyz. Aıta ketý kerek, ol úshin bizde barlyq jaǵdaı bar. Bıyl oblystyq «Jastar resýrstyq ortalyǵy» KMM-na 3 qabatty 1500,0 sharshy metrlik ǵımarat berilip, jastar úshin barlyq jaǵdaı jasaldy. Ortalyq janynda IT park, «So-working» ortalyǵy, «Jastardy kásipkerlikke beıimdeý» bólimi jáne «Saıahatshylar asosıasıasy» eriktiler tobynyń bólimi jumys jasaıdy, – dedi B.Dúısebekov.
BAQ ókilderimen kezdesýde ortalyq jetekshisi Túrkistan qalasyndaǵy jastardyń shet tilin jetik meńgerýi úshin atalǵan kóp fýnksıonaldy ortalyqta shet tilder mektebi tegin jumys isteı bastaıtynyn habarlady. Onda birinshi kezekte, aǵylshyn, orys, túrik, qytaı tilderi úıretilip, bul óz kezeginde shahardyń týrısik áleýetin odan ári arttyrýǵa septigin tıgizetinin jetkizdi.
El Prezıdentiniń búgingi jastarmen basqosýynda olardy bilimge, ǵylymǵa, ınovasıalyq jobalardy oılap tabýǵa baǵyttaý arqyly komersıalandyrýǵa beıimdeý qajettigin baıandaǵan B.Dúısebekov bul rette de túrkistandyq ákimdik mamandarynyń tıisti jumystardy atqaryp jatqanyn, daryndy jastardy aýyldy jerlerden izdestirip, olarǵa jaǵdaı jasaý máselesi oılastyrylyp jatqanyn jetkizdi.
Munan bólek, baspasóz otyrysynda jas aqyn Muqaǵalı Kenjetaıuly men Iasaýı atyndaǵy HQTÝ-ń stýdenti Úmit Rahymjanqyzy Ult Kóshbasshysy Nursultan Ábishulynyń búgingi jastarmen basqosýy elimizdiń keleshegi – jastarymyzǵa rýh berip, olardyń Otanymyzdy kórkeıtip, damytýyna odan ári kúsh beretinine senimi mol ekenderin aıtty.
Túrkistan oblysynda «Serpin-2050» baǵdarlamasy aıasynda – 9 313 jas qamtyldy. Bul respýblıka boıynsha bilim alyp jatqan jastardyń 50 paıyzdan astamyn quraıdy. Al 2018 jyly «Serpin – 2050» baǵdarlamasy aıasynda 440 jas oqýyn bitirdi. Onyń ishinde 63,3 paıyzy turaqty jumysqa ornalasty.
«Jasyl el» baǵdarlamasy boıynsha jyl saıyn 1275 jas jumyspen qamtylýda. «Dıplommen aýylǵa» jobasy aıasynda 913 jas maman jumysqa ornalasyp, 314 maman baspanaly boldy.
Elbasy Jarlyǵyna sáıkes jastarǵa áleýmettik qoldaý masqatynda bıylǵy jyly aýdan, qalalardaǵy 500-den astam jumyssyz azamattardy Túrkistan qalasynda salynyp jatqan qurylys jumystaryna tartý úshin «Túrkistan jastar qurylys jasaǵy» qurylyp, merdiger kompanıalarymen kelissózder júrgizilýde.
Memleket basshysynyń tapsyrmasyna sáıkes óńirlik «Jas Sarbaz» áskerı-patrıottyq jastar qozǵalysy quryldy.
Aıta keteıik, Jastar jylyna oraı 2019 jyldyń naýryz aıynan bastap jyl sońyna deıin «Aýdan jastarynyń Túrkistanǵa tartýy» atty aptalyǵy uıymdastyrylyp, 1000-nan astam mádenı-sporttyq is-sharalar uıymdastyrylmaq.
Sonymen qatar, bıyl «Túrki jastarynyń kongresi» jáne «Orta Azıa jastarynyń forýmy» halyqaralyq is-sharalary ótkizilýi josparlanýda.
Túrkistan oblysy ákiminiń baspasóz qyzmet
