10-24 mamyr aralyǵynda Shri-Lankanyń Kolombo qalasynda ótken bokstan 22 jasqa deiingi jastar arasyndaǵy Aziia chempionatynda Túrkistan oblysynyń jas boksshylary el mereiin ústem etti. Jastar sanatyndaǵy jarys máresine jetip, Qazaqstan quramasy sapynda óner kórsetken túrkistandyq bylǵary qolǵap sheberleri zor jetistikke qol jetkizdi.
Sary qurlyqtyń úzdik boksshylary jinalǵan dúbirli dodada otandyq sportshylar joǵary deńgeidegi daiyndyqtaryn dáleldep, biik jetistikke qol jetkizdi. Onyń ishinde Túrkistan oblysynyń sportshylary segiz birdei altyn medaldi qanjyǵalady. Atap aitqanda, 60 keli salmaqta Nurislam Qaldybek, 67 kelide Bahtiiar Anarbaev, 75 kelide Aman Qonysbekov qarsylastaryn aiqyn basymdyqpen jeńip, chempion atandy. Qyzdar arasynda 63 kelide Arýjan Jańabaeva men 75 kelidegi Shuǵyla Nálibai da óz sheberlikterin pash etip, altynnan alqa taqty.
Sonymen qatar, 2007-2008 jyly týǵan jasóspirimder arasyndaǵy jarysta da túrkistandyq boksshylar jarqyrap kórindi. 67 kelide Sultan Turdaly men 54 kelide Aldiiar Bahadýr úzdik óner kórsetip, chempiondyq tuǵyrdan kórindi. Al qyzdar arasynda 48 kelide judyryqtasqan Aiym Tankibaeva da eshkimge des bermei, altyn medal iegeri atandy.
Ǵalamat nátije kórsetken sportshylardyń barlyǵy — «Túrkistan kásipqoi boks klýby» men oblystyq joǵary sport sheberligi mektebi jáne oblystyq №3 olimpiadalyq sport mektepteriniń maqtanyshtary. Bul jetistikte olardyń jeke jattyqtyrýshylary — Oljas Orazaliev, Bolat Qasqaev jáne Qanatbek Shaǵataevtardyń tynymsyz eńbegi men kásibi sheberliginiń zor úlesi bar.
Aita keteiik, chempionat jeńimpazdary Halyqaralyq Boks Federatsiiasy tarapynan aqshalai syiaqymen marapattaldy: birinshi oryn iegerlerine — 1000 dollar, ekinshi orynǵa — 500 dollar, al úshinshi oryn ielerine — 250 dollar tabystaldy.
Bul – Túrkistan boksynyń jańa belesi. Qýatty daiyndyq pen tabandylyqtyń arqasynda jetken bul jeńis — bolashaq chempiondardyń qalyptasyp kele jatqanyn aiqyn kórsetti.
