Aqtaý qalasynda bokstan eresekter arasynda Shoqyr Bóltekulyn eske alýǵa arnalǵan XVI halyqaralyq týrnir aiaqtaldy. Apta boiynda ring kórkin qyzdyrǵan boksshylar básekesinde Túrkistan oblysynyń sportshylary tabysty óner kórsetti, dep habarlaidy Dalanews.kz. Túrkistan oblysy ákiminiń baspasóz qyzmetine silteme jasap.
Tartysty ótken jekpe-jekter nátijesinde 48 kelide Nurǵisa Turabekov pen 86 kelide judyryqtasqan Bekbolat Ábdikerim barlyq qarsylasyn tize búktirip, altynnan alqa taqty. Al 60 kelide Arslan Joldasbaev pen 71 kelide Temirhan Tezek qola medaldi qanaǵat tutty. Shymkentte Qaraqozy Ábdalievti eske alýǵa arnalǵan 43 halyqaralyq týrnir óz máresine jetti. Biyl joǵary dárejede uiymdastyrylǵan boks dodasynda Qazaqstan ulttyq quramasynyń úzdik bylǵary qolǵap sheberleri qatysyp, óz sheberlikterin baiqap kórdi.
Tartysty ótken jekpe-jekter nátijesinde Túrkistan oblysynyń judyryqty jigitteri 2 altyn, 3 kúmis jáne 2 qola medal oljalady. Júlde salǵan sportshylar qatarynda 54 kelide ring kórkin qyzdyrǵan Sáken Bibosynov jaraqatyna bailanysty kúmiske qol sozsa, 67 kelide Muhammedsabyr Bazarbaiuly altyn medaldi moinyna ildi. Al 67 kelide óner kórsetken taǵy bir jerlesimiz Baqtiiar Anarbaev qola medaldi qanaǵat tutty.
Sondai-aq 92 kelide qos túrkistandyq boksshy Saǵyndyq Toǵambai men Abzal Quttybekov aqtyq synda kezdesip, bar kúsh-jigerlerin kórsetti. Tartysty jekpe-jek nátijesinde Saǵyndyq Toǵambai jeńiske jetti. Osylaisha Saǵyndyq 1-oryn ielense, Abzal 2-orynnan kórindi. +92 kelide Túrkistan oblysynyń úmiti Nurlan Saparbai men elordalyq Aibek Oralbai bas júldege talasty. Nátijesinde Aibek Oralbai absaliýtti salmaqta jeńimpaz atandy. Osy salmaqta Daniial Saparbai qola medaldi oblys qorjynyna saldy.
