Aqmola oblysyndaǵy «Baldáýren» respýblikalyq oqý-saýyqtyrý ortalyǵynda sheteldegi qazaq diasporasynyń balalaryna arnalǵan «Atameken: qazaq DNQ-syn ashý» halyqaralyq balalar quryltaiy ótip jatyr, dep habarlaidy dalanews.kz.
Biylǵy aýysymǵa Mońǵoliia, Qytai, Ózbekstan, Resei, Qyrǵyzstan, Túrikmenstan, Túrkiia, Aýǵanstan, Iran, Tájikstan jáne Eýropa elderinen barlyǵy 288 bala jinaldy. Quryltai Qazaqstan Respýblikasy Oqý-aǵartý ministrliginiń qoldaýymen jáne Dúniejúzi qazaqtary qaýymdastyǵynyń uiymdastyrýymen ótkizilýde.
Quryltaidyń basty maqsaty – shetelde ósip jatqan qazaq balalarynyń tarihi Otanymen bailanysyn nyǵaitý. Osy eki apta ishinde qatysýshylar Qazaqstannyń tarihymen, mádenietimen, ulttyq dástúrimen jaqynyraq tanysyp, qazaq tilinde erkin sóilesýge, ózara tájiribe almasýǵa múmkindik aldy.
Uiymdastyrýshylardyń aitýynsha, joba ata jurtqa degen saǵynyshty ulttyq qundylyqtarmen ushtastyratyn erekshe alańǵa ainalǵan. Balalar jańa dostar taýyp, Qazaqstannyń túrli óńirlerimen jáne bir-biriniń mádeni ortasymen tanysyp jatyr.
Biylǵy aýysym «Atameken: qazaq DNQ-syn ashý» degen ataýmen ótti. Baǵdarlama qazaqtyń bolmysyn ana tili, dombyra úni, ulttyq án, salt-dástúr, úlkenge qurmet, kishige izet jáne týǵan jerge degen súiispenshilik arqyly tanytýǵa baǵyttalǵan.
Eki apta boiy balalar shyǵarmashylyq baiqaýlarǵa, ulttyq án saiysyna, sporttyq jarystarǵa, tanymdyq kezdesýlerge jáne dostyq festivaline qatysty. Sonymen qatar «ATAMEKEN DNA», «Elder men mádenietter palitrasy», «Bir áýen – bir halyq», «Júrekte qalǵan Baldáýren» jobalary uiymdastyryldy.
Biyl quryltaiǵa Mońǵoliiadan – 74, Qytaidan – 57, Ózbekstannan – 53, Reseiden – 50, Qyrǵyzstannan – 35, Túrikmenstannan – 15, Aýǵanstannan – 3 jáne Eýropa elderinen 1 bala qatysty. Jalpy qatysýshylar sany – 288.
Dúniejúzi qazaqtary qaýymdastyǵynyń keńesshisi Qarlyǵash Bekpatshaqyzy mundai jobalardyń sheteldegi qazaq balalarynyń tarihi Otanmen bailanysyn nyǵaitýdaǵy mańyzy zor ekenin aitty.
«Bul joba arqyly jas býyn Qazaqstandy jaqynyraq tanyp, ulttyq qundylyqtardy boiyna sińirdi. Ártúrli elden kelgen balalar ózara dostyq qarym-qatynas ornatyp, qazaq halqynyń mádeni murasyn tereńirek tanýǵa múmkindik aldy. Mundai bastamalar álem qazaqtarynyń birligin nyǵaitýǵa qyzmet etedi», – dedi ol.
Quryltai aiasynda balalardyń tarihi Otanmen bailanysyn nyǵaitýǵa, ulttyq mádeniet pen dástúrdi tereńirek tanýyna basymdyq berildi. Baǵdarlamaǵa qatysýshylardy irikteý men uiymdastyrý jumystaryn Dúniejúzi qazaqtary qaýymdastyǵy júrgizdi. Quryltai barysynda sóz sóilegen uiymdastyrýshylar mundai kezdesýlerdiń shetelde turatyn qazaq balalarynyń ulttyq bolmysyn saqtaýǵa jáne Qazaqstanmen bailanysyn kúsheitýge yqpal etetinin atap ótti.
Aita keteiik, ótken jyly da Aqmola oblysyndaǵy «Baldáýren» ortalyǵynda «Men Qazaqpyn» halyqaralyq balalar quryltaiy ótken bolatyn. Oǵan álemniń jeti elinen 288 etnikalyq qazaq balasy qatysqan edi. Biylǵy «Atameken» quryltaiy sol dástúrdiń jalǵasy boldy.
