Túrkistan qalasynda taǵy úsh otbasy qýanyshqa keneldi. Demeýshiler esebinen qabyrǵasy qalanyp, boi túzegen baspanalar áleýmettik qoldaýǵa asa muqtaj dep tanylǵan úsh otbasyna tabystaldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Ár úi 85 sharshy metrdi quraidy, úsh bólmesi, ashanasy jáne arnaiy shomylý bólmesimen qamtamasyz etilgen. Elektr jelisine, tabiǵi gaz ben aýyz sý júiesine qosylǵan.
Bul qýanyshqa oblys ákimi Darhan Satybaldy men qala ákimi Nurbol Turashbekov ortaqtasyp, otbasylarǵa izgi tilek-nietterin bildirdi.
Turǵyndar oblys ákiminiń qabyldaýynda baspana máselesin kóterip, kómek suraǵan bolatyn. Ótinish qabyldandy.
– Turǵyndardy baspanamen qamtamasyz etý – eń ózekti ári mańyzdy másele. Túrkistan oblysynda bul baǵytta jumys júrip jatyr. Shańyraqtaryńyz shattyqqa, jaqsylyqqa tolsyn. Shyn júrekten quttyqtaimyn! – dedi Darhan Satybaldy.
Baspana kiltin tabystaý sátinde turǵyndar osy igi iske uiytqy bolǵan azamattarǵa alǵysyn jaýdyrdy. Qazirgi tańda oblys ortalyǵynda úi kezeginde 17 myńǵa jýyq adam tirkelgen. 2014 jyldan beri Túrkistan qalasynda kezek boiynsha 3298 páter úlestirilse, demeýshiler esebinen 50-ge jýyq baspana tartý etilgen.
