Túrkistanda memlekettik satyp alýlarǵa qatysty kúmándi jaǵdailar tirkeldi. Qaladaǵy sáýlet jáne qala qurylysy bólimi óz ǵimaratyn jóndeýge 84 mln teńge bólgen. Alaida onyń negizdemesi birqatar suraq týǵyzdy, dep habarlaidy Dalanews.kz.
Goszakupturaly málimetine sáikes, jóndeý jumystary Túrkistan qalasy Baiburt kóshesi, 4-úide ornalasqan ǵimaratta júrgizilmek. Atalǵan mekenjai – tapsyrys berýshi mekemeniń, iaǵni qalalyq sáýlet jáne qala qurylysy bóliminiń ózi ornalasqan ǵimarat.
"Satyp alý tikelei kelisimshart arqyly rásimdelgen. Qujatta jumystar "qorǵalatyn tulǵalardyń qyzmetin qamtamasyz etý" maqsatynda júrgiziletini kórsetilgen. Alaida naqty qandai tulǵa týraly sóz bolyp otyrǵany ashyq jazylmaǵan", - deidi derekkóz.
Osy negizdeme qoldanylǵan jaǵdaida memlekettik satyp alýdyń tehnikalyq sipattamasy da kópshilikke qoljetimsiz bolady. Sonyń saldarynan smetalyq qujattardy qaraý, bólingen qarjynyń negizdiligin baǵalaý nemese jumys qunynyń sáikestigin tekserý múmkin emes.
Taǵy bir nazar aýdarar jait – merdiger kompaniia úshin bul memlekettik satyp alý júiesindegi alǵashqy jáne jalǵyz kelisimshart bolyp otyr. Buǵan deiin atalǵan jetkizýshi mundai tenderlerge qatyspaǵan.
Jalpy, keiingi aptalarda Túrkistanda dál osyndai negizdememen kóptegen kelisimshart jasalǵany aitylady. Bul tásil arqyly tek ǵimarattar ǵana emes, joldar, kósheler men saiabaqtardy jóndeý jumystary da rásimdelip jatyr.
Máselen, keibir kompaniialar birneshe kún ishinde osyndai kelisimder arqyly milliard teńgege jýyq tapsyrys alǵan.
Alaida osy jobalardyń eshqaisysynda naqty qai "qorǵalatyn tulǵanyń" múddesi úshin jumystar júrgizilip jatqany kórsetilmegen.
