Túrkistan qalasynda júrgizilgen birqatar memlekettik satyp alýlar qoǵam nazaryn aýdardy, dep habarlaidy Dalanews.kz.
Goszkupturaly paraqshasynyń málimetinshe, qalada milliardtaǵan teńgeniń tenderleri “qorǵalatyn tulǵalardyń qyzmetin qamtamasyz etý” degen negizben tikelei kelisim arqyly rásimdelgen.
Jariialanǵan derekke sáikes, tek bir kompaniia 20-26 naýryz aralyǵynda jalpy somasy 1,5 mlrd teńgege jetetin jeti memlekettik satyp alý kelisimshartyn ielengen. Onyń aiasynda ákimshilik-iskerlik ortalyqtaǵy joldardy jóndeý, Kongress-holldy qalpyna keltirý, birqatar kósheni jóndeý jumystary qarastyrylǵan.
“Sonymen qatar basqa merdigerlerge qala boiynsha jol tańbalaryn syzý, shaǵyn sáýlet nysandaryn ornatý, abattandyrý jáne kógaldandyrý jumystary da osy negizben berilgen. Keibir kelisimsharttardyń quny 1,5 mlrd teńgege deiin jetken”, - deidi derekkóz.
Budan bólek, 120 mln teńgeden astam somaǵa LED-ekrandar, bannerler men baǵdarshamdardy syrlaý, 137 mln teńgege qala sýburqaqtaryn jóndeý qyzmetteri satyp alynǵan. Sondai-aq áýejaiǵa aparatyn jol boiyna jaryq lentalaryn ilý, áýejaidaǵy VIP-zaldardy jóndeý, aýmaqty abattandyrý jáne jihazdardy himiialyq tazalaý jumystary da dál osyndai negizben júzege asyrylǵan.
Jazba avtorlary atalǵan shyǵyndardyń “qorǵalatyn tulǵalardyń qyzmetine” qandai qatysy bar ekenine kúmán keltirip, bul tájiribeniń Túrkistanda jyl saiyn qaitalanatynyn atap ótti.
Qazirgi tańda bul jaǵdaidyń naqty sebebi belgisiz. Paraqsha avtorlary memlekettik organdarǵa resmi saýal joldap, sýburqaqtardy jóndeý, kógaldandyrý men jaryq bezendirý jumystarynyń qorǵalatyn tulǵalardyń qyzmetine qalai qatysty ekenin anyqtaýǵa nietti ekenin málimdedi.
