Fermerler bazary 14 gektar jerde ornalasqan. Munda 900 saýda orny bar.
Túrkistan oblysynyń ákimi Ómirzaq Shókeev osy ekobazarda bolyp, jai-kúiimen tanysty. Bazar basshylyǵy men osy salaǵa jaýapty ókilderge diqandar úshin qajetti jaǵdaidy jasaý jóninde tapsyrma berdi. Bul jabyq bazar barlyq azyq-túlik taýarlary kóterme baǵamen satylatyn eń iri saýda ortalyǵyna ainalmaq.
Osy kúni oblys ákimi shaharda qurylysy qarqyn alǵan birqatar nysandardy aralap, qurylysshylarmen júzdesti. Merdiger kompaniia basshylarymen de kezdesip, jumysty jaýapkershilikpen atqarýdy júktedi. Salynyp jatqan jańa nysandardyń sapasy basty nazarda turýy tiis ekenin aitqan oblys basshysy qurylysty kestege sáikes aiaqtaýdy eskertti.
Turǵyn úi sektorlaryndaǵy injenerlik-kommýnikatsiia infraqurylymy júiesimen qamtyp, abattandyrý men kógaldandyrýǵa, halyqqa qolaily jaǵdai jasaýǵa kúsh salýdy tapsyrdy. Oblys ortalyǵynyń tazalyǵyn saqtaýǵa qatysty jaýapty sala basshylarǵa naqty tapsyrmalar berdi.
Halyqaralyq áýejaiǵa barar jolda júrgizilip jatqan kógaldandyrý barysymen baqylaǵan óńir basshysy qaladaǵy jańa arbat pen gúlzarlardaǵy abattandyrý jumystaryn pysyqtady. Sonymen birge «Alataý» media ortalyǵynda bolǵan oblys ákimi halyqaralyq telearnanyń aldaǵy josparlarymen tanysty.
Shahardyń jańa nysandaryn aralaý barysynda oblys ákimi ortalyq stadion jáne oqýshylar úiiniń ainalasynda júrip jatqan kógaldandyrý jumystaryn da zerdelep, merdigerlerge jumysty shiratýdy tapsyrdy.
