Bul týraly jyl basynan beri atqarylǵan aýqymdy sharalar men aldaǵy josparlardy jýrnalisterge aityp bergen Túrkistan oblystyq densaýlyq saqtaý basqarmasynyń basshysy Muqan Egizbaev málimdedi.
Ótken on aidy qorytyp esep bergen sala basshysy á degennen óńirde ólim-jitimniń azaiǵanyn aityp, qýantty. Jyl basynan beri týberkýlezden, qan ainalym júiesinen, qaterli isikten qaitys bolǵandar kemipti. Keler jyldan bastap Túrkistan qalasynan meditsinalyq nysandardyń boi kóteretinin eskersek, aq halattylardyń múmkindigi tipti arta túspek.
Aldaǵy jyly jańa oblys ortalyǵynda 190 oryndyq kóp salaly klinikalyq aýrýhana men onkologiialyq ortalyq, týberkýlezge qarsy dispanser men qan ortalyǵy salynady. Qurylystardyń barlyǵy da memlekettik-jekemenshik áriptestik aiasynda qolǵa alynbaq.
«Qazir onkologiialyq ortalyq qurylysynyń jobalaý-smetalyq jumystary júrip jatyr. Kelesi jyly aýrýhananyń, dispanserdiń, qan ortalyǵynyń smetasy jasalady. Jedel-járdem stansasy salynady. Túrkistanda emhana da jetispeidi. Keler jyly jańa zamanaýi talapqa sai emhana salamyz. 500 myńdai halqy bar Túrkistanǵa qazirgi emhana azdyq etedi», – dedi Muqan Egizbev.
Óńirde tek meditsinalyq uiymdar ǵana emes, maman da tapshy. Búginde Túrkistan oblysynda 135 dáriger jetispeidi eken. «Bul másele ásirese aýyldyq eldi mekenderde ózekti» deidi oblystyń bas dárigeri.
Muqan Egizbev, Túrkistan oblystyq densaýlyq saqtaý basqarmasynyń basshysy: «Kóbine belgili bir salanyń mamandary jetispeidi. Reanimatologtar az bizde. Sebebi, olar 9 jyl oqýy tiis. 7 jyl oqyp kelgen maman men onyń jalaqysynda eshqandai aiyrmashylyq joq. Sondyqtan kóbine jastar bul salaǵa kele bermeidi. Qazir biz ministrlikke bul mamandardy 3 ai ishinde oqytyp shyǵarý úshin usynys berip jatyrmyz».
Sala basshysy qazir meditsinalyq uiymdardyń qaǵazsyz jumys isteýge tas túiin daiyn dep sendirdi. Tsifrlyq tehnologiiany tiimdi paidalanyp otyrǵan aq halattylar aldaǵy ýaqytta naýqastardan bir de bir qujat suramaidy dep sendirdi óńirdiń bas dárigeri. Aitýynsha, qazirdiń ózinde 1 mln. 700 myń adamǵa elektrondy karta daiyndalyp jatyr eken
