Tanymal saiasatker Bolat Ábilev memleket qairatkeri Altynbek Sársenbaevtyń qazasyna 20 jyl tolýyna bailanysty áleýmettik jelide estelik jazba jariialady, dep dalanews.kz tilshisi kznews.kz saityna silteme jasap habarlaidy.
Ábilev óz jazbasynda bul istiń áli kúnge deiin tolyq ári ashyq tergelmegenin atap ótip, Qazaqstan tarihyndaǵy birqatar qaiǵyly kezeńderdi eske aldy.
Ol jazbasynda bul istiń áli kúnge deiin tolyq ári ashyq tergelmegenin aityp, Qazaqstannyń jańa tarihyndaǵy birqatar aýyr oqiǵalardy eske aldy. Ábilevtiń aitýynsha, el jadynda qalǵan qaiǵyly kezeńderdiń kóbi kúzdiń sońy men qys ailaryna tuspa-tus kelgen. Ol 2005 jyldyń qarashasynda Zamanbek Nurqadilovtiń óz úiinde qaza tapqanyn, bul oqiǵanyń mán-jaiy da áli kúnge deiin qoǵam úshin tolyq aiqyn emes ekenin atap ótti. Sonymen qatar saiasatker 1986 jylǵy Jeltoqsan oqiǵasyn, 2011 jylǵy Jańaózen qasiretin jáne 2022 jylǵy Qańtar oqiǵasyn Qazaqstan tarihyndaǵy aýyr ári umytylmaityn kezeńder retinde atady. Al 2006 jyldyń aqpanynda "Aqjol" partiiasynyń teń tóraǵasy Altynbek Sársenbaev kómekshisi Baýyrjan Bekbosynov jáne júrgizýshisi Vasilii Jýravliovpen birge qaza tapqan edi.
"Altynbektiń ketkenine 20 jyl ótse de, bul oqiǵa keshe ǵana bolǵandai áser qaldyrady. "Ne úshin?" degen suraq áli kúnge deiin mazalaidy", – dedi Ábilev.
Saiasatker Altynbek Sársenbaevtyń sol kezdegi saiasi ahýalǵa qatysty kózqarasyna da toqtaldy. Ábilevtiń aitýynsha, Sársenbaev el ishindegi bolýy múmkin qaýipter týraly joǵary bilikke naqty málimet jetkizgen. Onyń paiymdaýynsha, osy ustanymy men aitqan eskertýleri keiingi taǵdyryna yqpal etken bolýy múmkin.
"Altynbek eshqashan radikal bolǵan joq. Ol kúsh qoldanýǵa nemese tóńkeriske shaqyrǵan emes. Ol memleketshil kózqarastaǵy saiasatker edi. Sondyqtan da onyń ólimine qatysty "kimge tiimdi boldy?" degen suraq áli de ashyq kúiinde qalyp otyr.
Altynbek Rahat Álievtiń qaiyn atasy Nursultan Nazarbaevty joiýǵa daiyndalyp jatqanyn dáleldeitin aiǵaqtardy jinai aldy. Marat Tájinmen birge ol prezidentke baryp, Rahattyń osy josparlary týraly baiandady. Nazarbaev qatty qorqyp, dirildep, kreslodan qulap tústi. Altynbek pen Tájin oǵan qaita otyrýǵa kómektesti, al prezident abdyrap, shoshyp ketken kúide endi ne isteý keregin surady. Altynbek Rahatty jáne onyń jaqyndaryn tutqyndap, bilikten shettetýdi usyndy", – dep jazdy ol.
Ábilevtiń aitýynsha, bul iske tapsyrys bergen adamdar tolyq anyqtalyp, oqiǵaǵa ádil quqyqtyq ári saiasi baǵa berilýi qajet. Onyń pikirinshe, Altynbek Sársenbaevtyń qazasy táýelsiz Qazaqstan tarihyndaǵy eń aýyr, kúrdeli jáne áli kúnge deiin tolyq núktesi qoiylmaǵan saiasi oqiǵalardyń biri bolyp qala beredi.
"20 jyl ótse de, bul qylmys qoǵam jadynan óshken joq. Altynbek elge qajet saiasatker edi. Onyń joqtyǵy seziledi", – dep túiindedi Bolat Ábilev.
