Án men rýhtyń toǵysqan mekeni – Turan tóri taǵy da jahan jurtynyń nazarynda. Kieli shaharda halyqaralyq «Voice of Turan - 2025»qazaq ánderi festivali bastaldy. Festival qatysýshylary elimizdiń tanymal óner sheberlerimen birge qazaq ánderin oryndady. Túrkistannyń qoltańbasyna ainalǵan festivalge oblys ákimi Nuralhan Kósherov, Portýgaliianyń Qazaqstandaǵy elshiliginiń senimdi ókili Joze Ataide Amaral jáne shetelden kelgen ózge de meimandar qatysty.
«Kerýen sarai» kesheninde ótken shara qala turǵyndary men qonaqtaryna merekelik kóńil-kúi syilady. Álemniń ár qiyrynan kelgen ánshiler qazaq tilinde án shyrqady. Óńir talanttarynyń sahnalyq kórinisi, ónerpazdardyń án shashýy keshke sán berdi. Konkýrs qatysýshylary tanystyrǵan beinerolik kórsetildi. Biylǵy án dodasyna Qyrǵyzstan, Ózbekstan, Ázerbaijan, Tatarstan, Bashqurtsan, Túrkiia, Tyva, Portýgaliia, Rýmyniia, Italiia, Ońtústik Afrika, San-Marino, Kýba, Ekvador, Bolgariia, Týnis jáne Indoneziia elderinen kásibi ánshiler qatysyp jatyr.
Túrkistan oblysy ákimdiginiń qoldaýymen biyl altynshy ret uiymdastyrylyp otyrǵan bul joba jańa sipatta uiymdastyryldy. Ashyq aspan astynda áýezdi án shyrqalyp, rýhani úndestik toǵysty. Festivaldiń bas prodiýseri – Meiirjan Aliakbarov.
Túrkistan oblystyq mádeniet basqarmasy, Oblystyq mádeniet jáne halyq shyǵarmashylyǵy ortalyǵynyń uiymdastyrýymen ótkizilip jatqan festival maqsaty – qazaqstandyq avtorlardyń úzdik shyǵarmalaryn, qazaq tilin nasihattaý. Sonymen qatar Túrki álimniń rýhani astanasy – kieli Túrkistandy tanyta túsý.
Aita keteiik, 21 maýsym kúni festival qatysýshylary qazaq ánderin oryndaýdan baq synaidy. Sonymen qatar elimizdiń tanymal estrada juldyzdary óner kórsetedi. Qatysýshylardyń ónerin kásibi qazylar alqasy baǵalaidy. Qazylar alqasy quramynda Meirambek Bespaev, Sáken Maiǵaziev, Marjan Arapbaeva, Móldir Áýelbekova, Marhaba Sabi, Áli Oqapov, Baǵlan Omarov, Ergen Aitymbetov bar. Festival qonaqtary retinde Qazybek Quraiysh, «Melomen» toby, Ǵazizhan Shekerbekov jáne portýgaliialyq ánshi Lara Aleisho óner kórsetedi.
