12 tamyz – Halyqaralyq jastar kúni. Aitýly kúnge orai Túrkistan oblysy qoǵamdyq damý basqarmasy «Jastar resýrstyq ortalyǵy» KMM-niń uiymdastyrýymen «Jastarmen Birge» atty Gala-kontsert ótti. Arnaiy uiymdastyrylǵan merekelik sharaǵa oblys ákiminiń orynbasary Ertai Altaev qatysyp, jastardy merekemen quttyqtady.
– Qurmetti jastar! Sizderdi Halyqaralyq jastar kúnimen shyn júrekten quttyqtaimyn! Túrkistan oblysynda 671 myńnan astam jas turady. Bul – oblys halqynyń 30%-dan astamyn quraidy. Iaǵni, Túrkistan – naǵyz jastardyń óńiri! Oblysymyzda jastardy jumyspen qamtý, kásipkerlikke baýlý, bilim berý jáne mádeni-sporttyq áleýetin damytý baǵytynda naqty sharalar qabyldanýda.
2025 jyldyń ózinde ǵana 22 myńnan astam jas túrli memlekettik baǵdarlamalar aiasynda qoldaýǵa ie bolsa, 800 jýyq jas «Serpin» baǵdarlamasy aiasynda soltústik óńirlerge oqýǵa tústi. Túrkistan jastary búginde respýblika deńgeiinde ǵana emes, halyqaralyq alańdarda da tabysty óner kórsetip keledi. Bul – sizderdiń eńbekqorlyqtaryńyzdyń, umtylystaryńyzdyń jemisi, – degen Ertai Kenjebekuly belsendi jastarǵa alǵys hat tapsyrdy.
Gala-kontsertte jergilikti ónerpazdar men jastar arasyndaǵy tanymal ánshiler óz ónerlerin ortaǵa salyp, jinalǵan qaýymǵa este qalarlyqtai merekelik kóńil kúi syilady.
Aita ketsek, merekelik sharanyń maqsaty – jastardyń qoǵamdyq-saiasi, mádeni jáne áleýmettik ómirde belsendiligin yntalandyrý. Sondai-aq jastardyń jetistikterin atap ótý, olardy qoldaý arqyly jastardyń qoǵamdyq ómirdegi rólin nyǵaitýǵa baǵyttalǵan.
