Túrkistan oblysy ákimdigi janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi komissiia otyrysynda «Túngi qaladaǵy balalar» reidtik is-sharasyn jii ótkizý týraly sheshim qabyldanǵan bolatyn.
Maqsat – qoǵamdyq tártip pen jol qaýipsizdigin qamtamasyz etý, jasóspirimderdiń qatysýymen bolatyn qylmystardyń aldyn alý.
Osyǵan orai, Túrkistan oblysy ákiminiń orynbasary Beisen Tájibaev, oblystyq politsiia departamentiniń JPQ orynbasary, politsiia polkovnigi Begimhan Ahmetov, oblystyq adami áleýetti damytý basqarma basshysynyń orynbasary Nurjan Nurlybaev, Túrkistan qalasy ákiminiń orynbasary Erlan Kúzembaev, sondai-aq qalalyq Politsiia basqarmasynyń jeke quramyndaǵy 35 qyzmetker monitoringke qatysty.
Túngi saǵat 22.00-de Esim han alańynda bastalǵan reidtik shara «Otyrar» móltek aýdany aralyǵyn qamtydy. Komissiia músheleri eki topqa bólinip, birqatar oiyn-saýyq oryndary, kompiýterlik klýbtar men meiramhanalarǵa aralaý júrgizdi.
Nátijesinde oiynhanalar men meiramhanalarda kámeletke tolmaǵan balalar anyqtalyp, ata-analaryna ákimshilik hattama toltyrylyp, tirkeldi.
16 mekeme iesi saǵat 22.00-den keiin jasóspirimderdi zańdy ókilinsiz kirgizýge jol bergeni úshin ákimshilik jaýapqa tartylyp, tiisti sharalar qoldanyldy.
Túrkistan oblysy ákiminiń orynbasary Beisen Tájibaev óńir kóleminde jedel profilaktikalyq reidtik is-sharalar jalǵasyn tabatynyn jetkizdi. Atap aitqanda, kóshede jáne basqada qoǵamdyq oryndarda tiisti quqyqtyq tártipti saqtaý, qylmystardyń aldyn-alý jáne jolyn kesý jumystary atqarylady.
