11 qyrkúiekte Túrkistan halyqaralyq áýejaiynda Ulttyq ulanǵa tiesili áskeri-kólik ushaǵynda tehnikalyq aqaý týyndap, shassi bóliginde órt shyqty. Aldyn ala málimet boiynsha, oqiǵadan zardap shekkender joq, dep habarlaidy dalanews.kz.
Buǵan deiin Kóliktegi politsiia departamenti ushý-qoný jolaǵynda áýe kemesinde tehnikalyq aqaý anyqtalǵanyn jáne ony joiý jumystary júrgizilgenin habarlaǵan bolatyn.
Jýrnalist Mihail Kozachkov jariialaǵan málimetke sáikes, áýe kemesi Túrkistannan Astanaǵa ushýy tiis bolǵan. Ushaq bortynda alty ekipaj múshesi men 59 áskeri qyzmetshi bolǵan.
Aldyn ala aqparat boiynsha, ushý kezinde qozǵaltqyshtardyń birinde aqaý paida bolýy múmkin. Sonyń saldarynan avtomatty tejeý júiesi iske qosylyp, ushaqtyń shassi bóliginde órt shyqqan.
Órt áýejaidyń órtke qarsy qyzmeti kúshimen jedel sóndirilgen. Oqiǵa ornyna 13 maman men úsh tehnika jumyldyrylǵan. Málimetke qaraǵanda, Tótenshe jaǵdailar ministrliginiń bólimsheleri shaqyrylmaǵan.
Ushaqtaǵy barlyq jolaýshylar men ekipaj músheleri áýe kemesinen óz betinshe evakýatsiialanǵan. Zardap shekkender tirkelgen joq.
Oqiǵa saldarynan ushaq ushý-qoný jolaǵynda qalyp qoiǵandyqtan, birneshe reistiń ushýy keshiktirilgen. Keiin arnaiy tehnikanyń kómegimen áýe kemesi jolaqtan shyǵarylǵan.
Kozachkovtyń málimetinshe, aqaý Qytaidyń Shaanxi Aircraft Company kompaniiasy shyǵarǵan Y-8F-200WA áskeri-kólik ushaǵynda bolǵan. Bul model keńestik An-12 ushaǵynyń jańartylǵan nusqasy sanalady.
Ázirge Ulttyq ulan men ýákiletti organdar oqiǵanyń naqty sebepteri jóninde resmi qorytyndy jariialaǵan joq.
