Túrkistan oblysynda maqta jáne toqyma klasterin damytý jolǵa qoiylǵan. Oblys ákimi Nuralhan Kósherov sheteldik iri kompaniianyń bas direktorymen kezdesip, mata óndirý, kiim tigý salasynda investitsiialyq jobany júzege asyrý jaiyn jan-jaqty talqylady,- dep habarlaidy Dalanews.kz
Aimaq basshysy óńirde maqta-toqyma klasterin damytýǵa asa basymdyq berilgenin aityp, birlese jumys isteýge daiyn ekenin jetkizdi.
– Túrkistan oblysynda maqta-toqyma klasterin qurýdy qolǵa aldyq. Qazirgi tańda maqta óńdeýdiń tolyq tsiklin qamtityn iri jobalar júzege asyrylýda. Sizder usynǵan jobalardy da zerdelep shyqtyq. Óńir ekonomikasyna tiimdi jobalardy qoldaýǵa árqashan daiynbyz. Qujattandyrý jumystaryn súiemeldeimiz. Sharttarymyz da bar. Talaptardy belgilep, jiti zerdelep, memorandým jasaimyz, – dedi Nuralhan Oralbaiuly.
Joba aiasynda jip iirý jelilerin, sondai-aq, djinsy matalaryn shyǵaratyn, kiim tigetin óndiris jelilerin iske qosý josparlanǵan. Ol úshin Túrkistan qalasyndaǵy «TURAN» AEA aýmaǵynan 20 gektar jer qarastyrylýda. Toqyma óndiristik bazasy úsh kezeń boiynsha júzege asyrylmaq. Atap aitqanda, birinshi kezeńde rotorlyq iirý óndirisiniń, ekinshi kezeńde saqinaly iirý óndirisiniń, úshinshi kezeńde djinsy mata óndirisiniń qurylysyn júzege asyrý kózdelgen.
Kompaniia basshysy barlyq óńirler arasynan tańdaýy Túrkistanǵa túskenin aityp, jip iirý jáne mata shyǵarý baǵytyndaǵy jetistikterimen bólisti. Joǵary suranysqa bailanysty kiim-keshek tigetin zaýyt salýdy da josparlap otyrǵanyn aitty. Qurylys jumystaryn biyl bastaýǵa daiyn ári kelesi jyly 1 kezeń boiynsha jumystardy aiaqtaýǵa nietti ekenin jetkizdi.
100 paiyz jergilikti shikizatty (maqta) paidalana otyryp, ónimdi Eýraziialyq ekonomikalyq odaq (EAEO) sheńberinde eksportqa baǵyttaý, sonyń ishinde Ortalyq Aziia, Resei jáne Eýropa naryǵyna shyǵarý kózdelýde.
