Sharanyń maqsaty – Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy ulttyq birgeılikti saqtaý, ulttyq qod syndy bastamalarǵa qoldaý kórsetý.
Aıtýly sharada oblystyq etnomádenı birlestikterdiń qolóner buıymdary men ulttyq aspaptarynan kórme uıymdastyryldy.
Merekelik jıynda Túrkistan oblysy ákiminiń orynbasary Ulasbek Sádibekov óńir turǵyndaryn aıtýly merekemen quttyqtady.
– «Qazaqstan halqynyń tilderi kúni» merekesine oraı túrki dúnıesiniń qarashańyraǵy – Túrkistanda ótip jatqan tuńǵysh oblystyq til festıvali qutty bolsyn! Túrkistan – qazaq rýhanıatynyń altyn besigi, ulttyq qundylyqtardyń qazynaly dińgegi. Túrkistandyqtar til men dástúr, tarıh pen tárbıe turǵysynda baıtaq Qazaqstanymyzdyń barlyǵyna úlgi-ónege bolýy kerek, – dedi ol.
Jıyn barysynda óńirde til saıasatynyń júzege asýyna laıyqty úles qosyp júrgen birqatar azamattar marapattaldy. Sondaı-aq, oblystyq kúrdi etnomádenı birlestiginiń tóraǵasy Azımbaı Nadırov sóz sóılep, túrki áleminiń mádenı-rýhanı astanasynda qazaqstandyqtardyń tatýlyǵyn pash etetin Ortalyq Azıada teńdessiz kórikti «Birlik» arkasyn salýdy usyndy. Bul óz kezeginde týrıserdiń tamashalaıtyn kórikti ornyna aınalatyndyǵyn jáne birliktiń bir nyshany bolatyndyǵy jóninde atap ótti. Tilder merekesinde keleshekte oblys ortalyǵynda boı kóteretin «Dostyq» úıiniń alǵashqy jádigeri retinde «Dostyq kilemi» syıǵa tartyldy.
Saltanatty sharada qazaqstandyqtardyń berekeli birligin dáripteıtin «Shańyraq» poetıkalyq-horeografıalyq kompozısıasy sahnalanyp, etnomádenı birlestikterdiń janyndaǵy shyǵarmashylyq ujymdardyń qatysýymen konserttik baǵdarlama ótti.
Aıta ketetini, qazirgi tańda oblystyń barlyq aýdan, qalalarynda memlekettik tildi jáne orys, aǵylshyn tilderin tegin oqytatyn ortalyqtar jumys isteıdi. Óńirdegi etnos ókilderiniń 84 paıyzy memlekettik tildi erkin meńgergen.
Túrkistan oblysy ákiminiń baspasóz qyzmeti
